1482/2022-2023

Aizawl, 5th August, 2022 : Commonwealth Games-a India ram tana Gold Medal latu, Weightlifter Jeremy Lalrinnunga, August ni 8-a Aizawl-a lo hmuah dan tur chungchangah vawiin khan Sports & Youth Affairs Minister Pu Robert Romawia Royte hovin Sports & Youth Affairs Conference Centre-ah meeting neih a ni a.

Khawvel pum pui mithmuha Mizote hming timawitu Jeremy Lalrinnunga chu Mizoram sawrkar leh Mizo mipui ten a phu ang taka Lengpui airport-ah ropui taka lo hmuah ni se, tiin vawiina Sports Minister hova meeting chuan a rel a. Lengpui airporta lo hmuah dan tur te, airport atanga Aizawl khawpui panpui leh khawpui fanpui dan turte, an chenna Ainawn Veng thlenpui dan turah te ruahmanna mumal tak siam ni se, tiin Organising Committee din a ni a; an kutah mawhphurhna dah nghal a ni. 

Jeremy Lalrinnunga hi India Youth Olympics Gold Medalist hmasa ber niin kum 2018 khan Mizoram sawrkar chuan amah lawmpuina leh weightlifting infiamnaa dinhmun sang zawka inhlang zel tura hual nan cheng nuai 15 a pe a. Tun tumah hian Aizawlah a cham rei hman dawn loh avangin amah lawmpuina programme pawh hun remchang danga la buatsaih tur a ni a. August ni 9 hian Chief Minister-in thingpui a inpui ang a. August ni 10 ah Chief of Army Staff hmaa inlan turin Aizawl a chhuahsan leh nghal dawn a ni.

Vawiina Jeremy Lalrinnunga hmuah dan tur chungchang ngaihtuah hona ah hian Sports & Youth Affairs Department hotute leh sawrkar department pawimawhte, Ainawn Veng Local Council hruaitute leh Sports Association hrang hrang hruaitute an tel kim hle a ni.