No.2877/2021-2022 

Aizawl, 4th November, 2021: Tukin  zing khan Sports Minister Pu Robert Romawia Royte leh MSSC hotute chuan Republic Venga MSSC Sports Complex an tlawh a, a hmunhma tih changtlun belh dan turte an thlir ho a ni. 

Helai hmunah hian zanah pawh inkhelh theihna tur, Volleyball Court siamna tur ruahman fel a ni a. Cricket zirna hmun tur leh Archery (thalkah) zirna hmun turte  chu Republic Veng leh Republic Vengthlang khawtlang hruaitute leh Sports Association hruaitute, MSSC Vice President leh Secretary, Engineers te leh Sports Minister te nen a hmunah an sawiho nghal a, a hma thei ang bera hnathawh tan nise an ti a. Heng bakah hian Futsal Ground hmun tura ruahman pawh enho a ni a, MSSC ramah a len loh avangin thlanmual ram chu dil belh a ni a, thuneituten ram mamawh zat an pek theih beisei a ni.  

Sports Minister chuan Republic Veng MSSC Sports Complex chu veng bil emaw sports association mal emaw ta bik ni lovin Sorkar ta a ni a, veng tin leh sports association tinte len vena a ni a ti a, tha zawka vawn leh enkawl tum a ni a ti.      

Sports Minister hi bialtu AMC Councillor Pu David Zohmangaiha, MSSC Vice President Pu V.Lalzawmliana, MSSC Secretary Pu John Tanpuia MCS leh khawtlang hruaitute leh sports association hruaituten an tawiawm a ni.