3728/2024-2025

Dated : Aizawl, the 8th of January, 2025 : Vawiin chawhnu dar 2:00 khan MINECO, Aizawl-a Pu Lalnghinglova Hmar, Minister of State, Sports & Youth Services Department office-ah Viksit Bharat Young Leaders Dialogue 2025 a Mizoram team tel turte thlahna hun an hmang.

Mizo zirlaite zuk inlanna tur hi January ni 11 leh 12-ah Bharat Mandapam, New Delhi ah neih a ni dawn a. India rama thalai thlanchhuahte mithiamte leh sorkar laipui hotute hma a inlanin topic hrang hrang thlan bik 10 atanga India in hmasawnna rahbi kai a tum mek a ke a pen theih dan turte an sawi dawn a ni.

He huna tel turte hi kum hmasa lam November thla atang tawh khan Stage One atan online quiz neih a ni a. Hemi hnuah hian Stage Two atan essay competition neih leh niin Stage Three atan state level PPT presentation hmangin an inel leh a, hetah hian final stage a tel turte thlan niin Mizoram team ah hian mi 12 thlan chhuah an ni.

Sports Minister Pu Lalnghinglova Hmar chuan kal chhuak turte chu, "Delhi-ah inelna hmachhawn turin in kal tih kha in rilru tur a ni a, thildang dahtha rihin in kal chhanah insawrbing ang che u." tiin a fuih a. "Inrintawkna nei turin a inbuatsaih theih a, kan la dai ngai loh thil a nih pawhin kan beisei theih tur ang boruak atan a inbuatsaih theih a, kan chettlatna turte kan lo zirchiang lawk thei." a ti bawk.

Minister chuan sawi belhin, "Ram aiawh theihna hun remchang hi tu tan pawha thleng fo a ni lova, hei vang hian in inbuatsaih tawhna piah lamah theihtawpa inbuatsaih turin ka chah che u a. Theihtawp chhuah ula, hun nuam tak hmang turin duhsakna ka hlan che u." tiin a thlah.

Mizoram team te hi Theme pali a inel turin team li ah then an ni a. An inelna turte hi - Tech for Viksit Bharat; Enhancing Productivity in Agriculture; Empowering Youth for Viksit Bharat leh Empowering Women and Improving Social Indicators - te an ni.

Mizoram team te hi Dr. Rosaline Varsangzuali, Associate Professor, Govt. Hrangbana College leh Dr. H. Lalzuithangi, Associate Professor, Govt. Hrangbana College ten an hruai ang.

Thlahna hunah hian Pu Mark Lalthanliana, Jt. Secy, Sports & Youth Services, Pu H. Lalhmingthanga, Director, Sports & Youth Services Department, Pu Laltanpuia, Jt. Director, Department of Higher and Technical Education te leh sorkar mi pawimawh dangte pawh an tel a ni.