3495/2023-2024

Aizawl 25th January, 2024 : Pu Lalnghinglova Hmar, Sports & Youth Services Department changtu Minister chuan vawiin khan Govt. Aizawl West College, 31st Annual College Week kharna, Vanapa Hall-a neih chu khuallian niin a hmanpui.

Pu Lalnghinglova Hmar, Minister chuan kan Standard Time hi kan thenawm ramte aiin darkar khatin a tlai sa a. Mi tam tak zingkara hna tam tak thawk hman an awmlaia mut nana hun kan hman zel chuan kan inenlet a ngai takzet a ni tiin zirlaite chu zing tho hma a, taima turin a chah a. Thingtlang lam atanga Aizawla lehkha zira awm mekte pawh nu leh pa te'n lehkha zir tura min tih ang ngeiin Aizawl-a awm ringawt duhtawk lova, thiamna tak tak zir chhuak turin a chah bawk. Zirlaite chu an zirlai bakah Mizoram History, Geography leh Politics te hriat ve zel tum tura chahin tawng chi hrang hrang, a bik takin English, Hindi leh Japanese tawngte eizawn theihna tur khawpa thiam tum tur leh an family background avanga chhuanlam siam lo tura chahin thawhrimna hmanga an thiamna te tihmasawn zel turin a chah bawk a ni.

He hunah hian Prof. C. Lalthlengliana, College Principal leh Pu Lalawmpuia Khiangte, President, Alumni Association pawhin zirlaite fuihna thu tha tak tak an sawi bawk.

Govt. Aizawl West College-ah hian College Student 927 an awm mek a. History Subject bikah Post Graduate a zir theih bawk a ni. Teaching Staff 33 leh non teaching staff 9 an awm mek a. House pali, Blue, White, Red leh Yellow-ah inthenin infiamna chi hrang hrangah an inel a. A pumpuiah Blue House an Champion a ni.

College Week kharna hun hi hun hnih, chawhma hun leh chawhnu hnuah then niin College Week hman chhunga House hrang hrangte inelna, lawmman chi hrang hrang sem nghal a ni bawk.

GAWC 31st Annual College Week kharna hunah hian zaithiam tak takte an zai bakah Dance Crew leh College Live Band te an perform bawk a ni.