No.1773/2021-2022
Aizawl, 10th August, 2021 : Vawiin khan Sports Minister Pu Robert Romawia Royte chuan Lengpuia MSSC Mini Sports Complex hmuna Khelo India sum Rs 500 Lakh senga Football Astroturf Field siam mek chu a tlawh a. MSSC engineer te report danin he field hi a dung 110 metre leh avang 74 metre phullem phah bakah a sir kual chhuakin footpath metre 2 chu Paver block phah kual leh hung a ni bawk. Football Field hnathawh hi zawh tawh niin a pavillion leh compound light system sak mekte chu tun August thla chhunga zawh theih beisei a ni. Helai hmunah vek hian Hockey Ground leh sports facilities dangte siamna tur hmun pawh Minister hian a en tel bawk a ni.

Lengpui GSA leh VC aiawhte chuan Khelmual tha an neih dawn tak avangin Minister leh Bialtu MLA Er H.Lalzirliana chungah an lawmzia thu, ziakin an lo hlan a. Pu Robert Romawia chuan Covid hripui leng karah Lengpui field siam puitlin a lo ni ta chu lawmawm a tih thu sawiin Lengpui GSA te nghahhlelh ang ngeiin naupangte leh thalai ten tangkai taka an hman theih tura ruahmanna siam a nih tur thu a sawi a. Bialtu MLA Er. H.Lalzirliana pawhin thu sawiin Lengpui Football Fielda phullem phah chu a bial mipui tan vanneihna a ni ringawt lova, Mizoram Sorkarin sum tam tak a lakluhna a ni a. He project atana senso 12%( Rs 60 lakh) leh 1%(Rs 5 lakh), avaiin Rs 65 lakh chu sorkarah a lut a. Rs 35 lakh chu Mizoram sorkar ta niin a bak Rs 30 lakh chu Central sorkarah chhun luh a nih thu a sawi a. Covid hripui avanga Sorkarin sumah harsatna a tawh laia Phullem projects hmanga sorkar sumbawma State budget pawnlam sum chhunluh a ni thin hi a ropui tak zet a ni a ti.

Sports Minister chuan Muallungthu a MSSC Complex a Khelo India sum Rs 550 lakh senga Hockey Astroturf Ground siam mek leh Rs 500 lakh senga Football Astroturf ground siam tharna hmun tur te tlawhin Hockey grounda phah tur Astroturf te pawh a endik nghal a. Aizawl hnaivai hmun remchang taka FIH standard Hockey Field leh FIFA standard Football Field awm dun chu thalai infiammite tan a hlu hle dawn tih sawiin he hmun ah hian Tourism Department atanga intihhlimna hmun siamna turte khawtlangin pek belh thei se chuan project hlawhtling tak a siam theih ngei a rin thu a sawi a. Heng field 3 te hi Decor India Pvt Ltd, SAI empanelled contractor ten an thawk a ni.

Aizawl South III bialtu MLA Prof F.Lalnunmawia pawhin a bial chhunga infiamna ruhrel tha dah anih avangin a khua leh bial mipui aiawhin lawmthu a sawi a. Central sorkar leh state sorkar zawng zawngin suma harsatna an tawh vek laia Sports Department ten hmasawnna hna an thawk reng thei chu lawmawm a tih thu sawiin sports infrastructure tha siam a nih bakah Mizoram sorkarin sum tam tak a lalut bawk chu thil lawmawm tak a ni a ti a, mipui ten an hriat chian pawh a tha a ni a ti.

Sports Minister hi Prof F.Lalnunmawia MLA leh Er H.Lalzirliana MLA, David Zohmangaiha, AMC Councillor te bakah, Olympian C.Lalremsanga DSYO te,Pu R.Lalhnuna MNF PAC Member te,Footballer Lalengmawia(Apuia),Footballer Rohmingthanga leh Hockey Mizoram Hony Secretary Pu H.Lalrinfela leh khawtlang hruaituten an tawiawm a ni.