Pu Robert Romawia Royte, Minister of State, Sports & Youth Services, Tourism, I&CT chuan vawiin khan a office chamber-ah Press Meet neiin, Mizoram state leh Zofate tana pawimawh tak ‘Mizoram State Games 2019’ leh ‘Paragliding Accuracy World Cup 2020 & Grand Festival’ chungchang thuchiang zawkte chanchinthar lakhawmtute a hrilh a. Kum tam tak Mizoram-ah neih tawh loh State Games chu ni 9-23 December, 2019 chhungin Sports & Youth Services Department huahawtin neih tum a ni a, inbuatsaihna pawh a kal mup mup reng a; heng sorkar hmalaknate media lamin theihtawpin thlawpa mipuite hnenah zau theih ang bera puangzar turin a sawm a ni.

Sports Minister chuan Mizoram State Games neih tur hi Council of Minister-in lungrual leh phur taka a pass a nih avangin Sports Department hmalakna mai ni lovin sorkar hmalakna a ni a, sorkar pawhin chak taka bawhzuiin State Level Organising Committee siam tawhin he State Games thlenna turin Rs.150 lakhs budget-ah a dah a, hei bawk pawh hi a tul anga ngaihtuah belh mek a ni a ti.

Mizoram State Games 2019 ah hian MLA Constituency hrang hrangte inelna neih tur a ni a, MLA te hi an bial chhung theuhah Chairman an ni a, Constituency Level Committee te a tam zawkin an din tawh a, Constituency level-ah hian hmalakna pawh a kal mup mup tawh a ni. Constituency Level Committee te an inbuatsaih nan advance-in Rs.50,000/- theuh pek an ni phawt ang a, Constituency tin atanga infiammi lo kal tur zawng zawngte chu TA/DA pek vek a ni dawn avangin heng atana sum an mamawh tur chu pek leh vek an ni dawn tih Pu Robert Romawia’n a sawifiah. Sports Association-te chu thuneihna sang tak pek an ni dawn a, technical thil zawng zawng an kutah dah a ni ang a ti bawk. State Level Committee chhut danin Constituency tinte discipline zawng zawngah chhuak kim vek chuan Player 15120 an awm ang a, anni bakah technical official leh sorkar official engemawzat awm tura ngaih an ni bawk. Medal hi Gold-403, Silver-403 leh Bronze-565 awm tura ngaih a ni bawk a, Games hi sport discipline 32 laiah inelna neih a ni ang a, Men’s Events-ah 132 awmin Women’s Events-ah 88, a zavaiin 221 lai a awm dawn a ni.

Pu Robert Romawia Royte chuan kum 32 hnua he State Games neih turah hian infiammi tam tak tan intuaitharna tur a ni a, sport discipline tih ngai tawh meuh loh leh thangtharte pawhin a taka an la hmuh ngai loh tam tak tihthar lehna tur leh Mizo hnamzia tilang thei Indigenous Games/Mizo Infiamna engemawzatah inelna siam a ni bawk dawn a ni a ti. State Games hawnna ropui takin 9th December-ah neih a ni ang a, state chhung leh pawnah pawh ‘live’ veka tihchhuah tum a nih thu a sawi a. He State Games hi mipuite pawhin an hlutsak thiam a, rawn en vek turin mi zawng zawng a sawm a, Mizo mipuite ta liau liau leh a hmang tangkai tur pawh Mizo thalaite an nih avangin player tam thei ang ber an chhuah theih nan Mizoram mipui zawng zawngten tawiawm turin Sports Minister chuan a sawm a ni.

Minister Pu Robert Romawia Royte chuan nakkum February ni 10-16, 2020 chhungin Serchhip leh Keitum inkar Dawngzawl ah ‘Paragliding Accuracy World Cup 2020 & Grand Festival’ neih tum a nih thu a sawi bawk a. Khawvel huapa Paragliding lam hotute chuan  Sports Minister hnenah a hmaa Pre-World Cup an rawn neih tawh atangin Dawngzawl hmun chu paragliding atan duhthusam a nih thu sawiin Mizoram-in World Cup thleng se an duh thu an rawn hrilh a; hemi rual hian tourist tam thei ang ber hip thei turin ‘Grand Festival’ neih nghal a ni dawn a ti. Hemi atan hian sorkar chuan Rs.20 lakhs a dah thu a sawi bawk.

Vawiin Press Meet-ah hian Sports Minister hian Mizoram State Games 2019 atana siam LOGO leh MASCOT a tlangzarh nghal a, State Games Mascot atan hian Mizoram State Bird ‘VAVU’ hman a ni.