1287/2023-2024

Aizawl, the 27^th July 2023 : India in G-20 President hnihna a chelh mek laia programme hrang hrang siam zinga thalai te tinzawna programme siam, Y20 Meet on Nationalism, Patriotism and Development, intawhkhawmna, Mizoram chhunga hetiang programme 5-na chu Pachhunga College University (PUC) ah vawiin khan neih a ni a. He hun hi Sports & Youth Services enkawltu Minister Pu Robert Romawia Royte’n khuallian niin a hmanpui a. SEDP hnuaia Sports & Youth Services Board Vice Chairman Pu TC Pachhunga chu he hunah khualzahawm a ni.

Sports Minister Pu Robert Romawia Royte chuan thalai te tan ram leh hnam hmangaihna rilru thalai te zinga tuh leh put a pawimawh leh a tulna te sawiin mahni ram leh hnam ngaihsanna chang hre lova, hmangaihna nei lova, nationalism thinlung kan neih loh chuan hnam a boral thei a ni, chuvangin nationalism ngaihtuaha, hemi kawnga kan thanharh hi thil pawimawh tak a ni, a ti. Ram ropui tihte Europe khawmual ram thenkhatte chanchin sawiin hnama an chiang ah, nationalism rilru an neih avangin an ramte a hmasawnin a changkang a, hnam ngaihsanawm leh ropui an nihna chhan chu ram leh hnam hmangaiha an neih vang a ni, a ti.

Manipur buaina chungchang sawiin hnam khat kan nihna in inphuarkhawm a, an tawrhna kha kan tawrhna a ni a, he thil thleng hian hnam anga kan inpumkhatna hi a sawh nghet niin sawi. MNF anga Mizo hnam movement pianchhuah dante, a chhuanawmna leh hnam anga kan hlawkpuina te sawiin Inremna Thuthlung khan Ram Danpui hnuaia kan hnam himna tur constitutional safeguards min dah saka, chu chu Article 371 G hnuaia a bika thuneihna kan neih thenkhatte a ni a, he thil ropui tak hi state tam tak ten a nei mia lova, Mizo nationalism rahchhuah niin a sawi thei a ni, a ti.

Khualzawhawm Pu TC Pachhunga pawhin thusawiin thalaite tana nationalism rilru neih leh put pawimawh dan hrang hrang te a sawi a ni.

Y20 Meet ah hian thupui  sawihawnna chu Pu Lalnuntawma Fanai, Adviser MZP chuan neiin thupui sawizauna a bikin Zo hnahthlak te tana nationalism pawimawh dan chu Prof. J Doungel in a sawi a. Pu C. Lalrinfela, Informatics Officer, ICT Department leh Pi Vanlalhruaii, MSD&RB, Social Welfare & Tribal Affairs Department ten thalai te tinzawin presentation an nei bawk a ni.

Y20 Meet hi Y20 Secretariat, Ministry of Youth Affairs & Sports, Government of India ruahmanna hnuaia Sports & Youth Services Department leh MZP tangkawpte buatsaih a ni.