Vawiin chawhnu dar 1.00 khan Sports Minister Pu Zodintluanga chuan Ramhlun Sports Complex-ah Ramhlun Sporting Club (RSC) hnenah Taekwondo infiamna atana hman tur thelret zampher dup phek 144 a hlan a; Lunglei District Karate Association hnenah pawh zampher dup hi 144 a hlan bawk.

Sports Minister chuan, “Mizoram-in hetiang taka infiamna kan buaipui chho a, hlawhtlinna hrang hrang kan nei mek hi sawrkar ruahmanna piah lamah, sports association tin te, infiammite leh nu leh pate tanrualna te, inpekna leh tih tak thinlung pu chunga infiamna kan luhchilh tak vang a ni a. Sawrkar duh dan tihlawhtling tura sports enkawltute taimakna a fakawm a ni” a ti. Pu Zodintluanga chuan, “Sawrkar chuan kan thalaite infiamna tur hmanrua leh hmunhma chu a ngaihtuahsak zel dawn a; hmanrua neih that ngawt hi a tawk lova, kan hlawhtlinna tak tak chu kan rah chhuahah a innghat zawk dawn a ni. Chuvang chuan thiam zul ringawt lovin, champion tlaka inchherchhuak ngei turin naupangte thinlungah rilru puthmang dik kan tuh a ngai a ni” a ti bawk.

Inkhawm kaihruaitu Sports Special Secretary Pu R. Lalvena IAS chuan, “Sports Minister viak tha tak leh a ngaihna hria kan nei a, a enkawlna hnuaiah hian kan hmalam a eng em em a. Tuna kan lawman bakah hian lawm lehzualna tur tam takin min hmuak a ni” a ti. RSC President Pu Lalrinmawia chuan lawmthu sawiin, “Kan neih phak loh kan awh em em si min petu leh a ngaihtuahnate a taka chantirtu Sports Minister chungah kan lawm tak meuh a. Hmanrua min pek hi kan tan chona nasa tak a ni a; Mizoram aiawh tur leh champion tur infiammi rawn chherchhuah ngei kan tum ang” a ti.

Vawiina thelret zampher sem takte hi China siam a ni a, World Taekwondo Federation pawhin khawvel huap intihsiaknaa an hman thin a ni a; Beijing Olympics-ah pawh khan hman a ni nghe nghe. Zampherte hi awlsam taka rem zawm theih a ni a; metre 12 bial a khuh a, set khat hi Rs 1,58,528 man a ni.