Vawiin chawhnu dar 1.00 khan Mizoram State Sports Council (MSSC) Executive Committee chuan President Pu Zodintluanga pisaah meeting an nei a; he meeting-ah hian Pu Zodintluanga chuan MSSC hnuaia Sports Association hrang hrangten kum 2008 – 2012 chhunga khawvel huap te, National level leh North East level-a intihsiakna chi hrang hranga an hlawhtlinna theuhte ziakna ehkhabu a tlangzarh a ni.
Sports Minister leh MSSC President ni bawk Pu Zodintluanga chuan, “Kum 2008 atanga infiamna peng hrang hranga Mizoram thalaiten hmuh theiha hma kan sawn hi kan zavaia thahnemngaihna rah chhuah a ni a. Kan thlen chin atanga hmasawn zel turin ruahmanna kan siam danah te, kan inrelbawlna kawngah te, kan thawhhona kawngahte tha thlah miah lova tan kan lak mar reng a ngai a ni” tiin committee member-te a fuih a ni.
He meeting-ah hian Sports Council hnuaia hnathawktute zinga kaisanna post nei ve lote tana Modified Assured Career Progression (MACP) hman chungchang te, sports association thenkhatte dinhmun thlirletna te sawiho a ni a. Sports association thenkhat kalphunga harsatna awm mekte zir chiang tur inruat a ni a; meeting chuan infiammite tana harsatna awm thei apiang chu a theih chin apiangah sutkian dan dapsak zel ni se an ti a ni.
Mizoram aiawha infiamnaa fehchhuak turte reng reng chuan MSSC bituk ang – physical fitness test – an paltlang ngei ngei tur a ni tia rel tawh chu khauh zawka kenkawh ni se tih he meeting hian a rel a; he fitness test paltlang hmasa lo chuan infiammiten Mizoram ai an awh theih tawh dawn loh avangin sports association tinte chu an calendar milin infiammite chu physical fitness test atana hun thawl tak siamsak turin hriattir an ni.
