Olympic Vision 2016 ngaihtuah chungin Sports & Youth Services Department chuan intlansiak thui chi Marathon Race, December ni 17 khian buatsaih a tum a. Hemi chungchang sawiho tur leh he intlansiakna atana ruahmanna siam turin vawiin khan Sports & Youth Services Department Secretary Pu Zothankhuma, IAS hovin Sports & Youth Services Department leh Mizoram State Sports Council-a senior officer te chuan a pisa-ah meeting an nei a ni.

December ni 17 a Mizoram pum huapa Marathon Race nei tura atana inbuatsaihna chi khat atan Mizoram khaw hrang hrang hmun 10 – Lunglei, Saiha, Sangau, East Lungdar, Ratu, Kawrthah, Bukpui, Kolasib, Aibawk leh Champhai ah te Marathon race hi buatsaih a ni tawh a. Heng khaw 10 atanga timing neih tha zual infiammi 30 te chu he Marathon Race ah hian an tlan dawn a. Anni bakah hian Aizawl leh hmun dang atanga Marathon race a tlan duh te chu Sports & Youth Service Directorate, Saron Road, Dawrpui-ah in report tur a ni ang a, mipa tan chauh tel theih a ni.

Vawiin meeting ah hian Marathon Race hlawhtling taka neih a nih theih nan rawtna leh ruahmanna hrang hrangte chu chipchhiar taka sawiho a niin ruahmanna felfai tak siam nghal a ni. Meeting-ah hian Transport Department leh Aizawl Traffic officer te bakah Central YMA aiawh te pawh an tel a ni. Ruahman dan chuan December ni 17 zing dar 6:00 khian Marathon Race hi Treasury Square atanga vailiam tur a ni a. World Bank Road, Khumtung Peng thleng tlan thlengin, Aizawl panin an rawn kir leh ang a, Rajiv Gandhi Stadium rawn lutin, Marathon race hi an zo ang, an tlan tur thui zawng hi km 42.195 a ni.

Hemi ni vek hian lawmman semna hun pawh Rajiv Gandhi Stadium a buatsaih nghal tum a ni a. Pakhatna in lawmman Rs. 30,000, pahnihna in Rs. 20,000 leh pathumna in Rs. 10,000 an dawng dawn a, hemi bakah hian darkar thum leh a chanve a tlan thleng tan Consolation Prize siam a ni dawn bawk.

Heta titha zualte hi nakkum National Games-a an tel ve theih ngei turin coaching camp buatsaih tum a ni.

Central YMA hian tun hma lam khan hetiang Marathon Race hi tum li lai an lo buatsaih tawh a ni.