Vawiin chawhma khan Melthum dai a Zampuimanga thlanlung hmunah Sports & Youth Services Minister Pu Zodintluanga chuan National Service Scheme (N.S.S.) Voulunteer-te hnatlanga fehchhuak tur a vailiam a. N.S.S. Volunteers hnathawk tura rawn chhuak te hi Aizawl khawpui chhunga Higher Secondary School hrang hrang a zirlaite, College zirlaite leh MZU a zirlaite an ni a, Maubuang Damdai khawdai leh Hmuifang tlang inkar World Bank kawngpui dunga N.S.S. thingphun takte hmunhma sam fai pahin thingtiak dam khawchhuak lo hmunah te thingtiak an phun bawk dawn a ni.

Flag-off function a thusawitu, Minister Pu Zodintluanga chuan thlalai tam tak ram leh hnam hmasawnna atana phur taka rawn fehchhuak te hmel hmuh chu a phurawm thu sawiin thing leh mau humhalh chu thalaite mawhphurhna pawimawh tak tak zinga pakhat a nih thu a sawi a ni. Heng thing leh mau te hi thang thar te tana rohlu tak siam sakna tha tak a ni a ti a.A ni pawh in ram hruaitute thusawi, “zirlaite hi, nakin lawka kan ramhruaitu tur te in ni’, tih an sawi thin chu zirlai anga a lo ngaihthlak tawh thin thu leh awih vak thinlo pawl a mi ni lo ni ve tawh mahse, a taka ramhruaitute lo sawi lawk thin dikzia changtu a nih thu te sawiin thalaite chu nakin lawka ramhruaitu tur te an nihna chu ring tur leh tun atanga ram tana phur taka hna thawk zel turin a fuih a ni. Sawrkar hmalakna hnuaiah Green Mizoram programme kaltlang thingphun tam tak enkawl zui a nih loh vanga puitling ta lo thin te chu pawi a tih thu sawiin N.S.S. hmalakna erawh chu a chhuan awm thu sawiin hna tha an thawh mek chu chhun zawm zel turin a chah a ni.

Vawiin, September 24, N.S.S. dincham vawi 21-na puala programme duan hi, Dr.Lalzuiliana, Liason Officer, NSS Cell, Sports & Youth Services Department chuan a kaihruai a. Minister hian NSS te thingphun tanna Damdiai khaw dai ah thing a phun bawk a ni.