936/2025-2026

Aizawl, June ni 25, 2025:  Pu Lalnghinglova Hmar, Minister of State, Sports & Youth Services Dept. etc., leh Aizawl West II Assembly Constituency bialtu MLA ni bawk chuan vawiin tlai khan MINECO, Aizawla a office chamber-ah a bial chhung atanga HSSLC Exam 2025 (Commerce stream) a pangana Joan Malsawmkimi d/o KJ Lalbiakngheta, Tuikual North chu lawmpuina hlan.

Thu sawiin Sports Minister Pu Lalnghinglova Hmar chuan lehkha thiam an pawimawh thu te, vengchhung leh khawtlangah midangte entawn tur leh chona siamtu, midangte kawhhmuhtu nih theihna a ni a ti a. Joan Malsawmkimi a lawmpui thu a sawi rualin, lehkha la zir tur leh hna la thawk tur a nih angin tuna a hlawhtlinna chu fuihtu leh tiphurtu ni se a duh thu a sawi. 

Aizawl West-II bialtu MLA chuan lehkha chhiar tam a pawimawh thu sawiin, tunhnai NEET result-ah khan Mizoram dinhmun a lan chian thu te, kan hlawhtlinna neihte a chhuanawm rualin India ram atanga intehin kan tluk loh an tam avanga theihtawp chhuah kan la mamawh thu a sawi a. Nitin a hmasawn zel tum tura mahni thlen chin a insawrbing zel turin a fuih bawk.

Bialtu MLA hian Joan Malsawmkimi lawmpuina’n thuziak leh laptop a hlan nghal a. Lawmpuina hunah hian zirlai chhungte leh khawtlang hruaitute an tel a ni.