Vawiin chawhma dar 11:00 khan Directorate of School Education Conference Hall-ah State Advisory Board of Education (SABE) chu Pu Lalsawta, School Education Minister hovin an thukhawm.

He meeting Pu Lalsawta, School Education Minister kaihhruaiah hian ngaihtuah tur Agenda 22 zingah Mizoram-a Engineering College din ve a tul tawh thu sawi lan a ni a. Mizo naupang ten State pawn pan buai ngai lo a keimahni State chhungah man tlawm zawk leh hautak lo deuh zawk a Engineer an zir ve theih nan Mizoram State Engineering College neih ve hi a tul viau tawh thu member ten an sawi bakah Champhai leh Kolasib Polytechnic tana post siam belh dilna te, JEE, JEE-Advance leh NEET te hi National Level Competitive Exam an nih avangin Mizo naupang a tam thei ang ber an tlin theih nan tun dinhmun a Class-XIl (Sc.) awmna District hrang hrangah te hian JEE/NEET Coaching Class buatsaih ni thei se tih sawi ho a ni bawk.

Heng bakah hian Mizoram Polytechnics, Lunglei-a Seat awm theih zat tih tarn te, Aizawl-a Polytechnic thar din tul dan te Mizoram State Open School chungchang te bakah Education atana thil pawimawh tak tak te sawiho a ni.

Meeting-ah hian Commissioner & Secretary, School Education Department, Director School Education Department; Viee-Chancellor Mizoram University te bakah State Advisory Board of Education (SABE) member pawimawh tak tak te an tel.

Education chungchang, Primary, Middle, Highschool, Higher Secondary, College leh Professional zirna in leh a enkawl chungchang thahnem tak sawiho a ni bawk.