Tourism Minister Pu S.Hiato chuan ni 22 May 2013 khan E.Lungdar-a Tourist Lodge sak thar a hawng a, a tukah N.Vanlaiphai-a Tourist Lodge sak thar a hawng nghal bawk.

Hawnna thu sawiin Minister chuan Tourist Lodge sakna tura ram tha tak khawtlangin an pek avangin lawmthu a sawi a, Tourism chu ram sum hmuhna hnar pawimawh tak a ni tiin ram tam takin tourism chu ram dinchhuahna atan an hman thu a sawifiah bawk. Mizoram chu Pathianin ram nuam tak, boruak sik leh sa nuam tak, boruak thiang leh tlangram mawi taka a siam a ni tiin Minister chuan chu chu khualzin mite hmuh chak ber a ni, a ti a, chu ram duhawm tak vawn leh enkawl chu a chhunga chengte mawh a ni, a ti. India Sorkarin Look East Policy a kalpui mek chuan thil tam tak a hawng dawn a ni tiin Pu S.Hiato chuan khawchhak ram te nena insumdawnna tur pawh kawng min hawnsak dawn a, chumi atana kan lo inbuatsaih a tul a ni, a ti bawk. Chumi tihhlawhtlin nana Sorkarin NLUP a kalpui mek chu rahbi pawimawh tak a ni zel a ni, a ti bawk.

Minister tawiawmtu Parliamentary Secretary Pu H.Zothangliana pawhin thu sawiin kum 2009-a sak zawh tawh chu siamthat ngai a tam avanga tuna hawn a nih chhan te a sawifiah a, helai tlangdung nuam tak, hmanlai pi/pu te sulhnu hmuh tur tam tak awmte chu khualzinte hiptu tur a ni tiin ngaihngam tak leh nuam ti taka khualzinte an lo kal theih nan mipui te tawiawmna a ngen bawk. Tourism leh Sports & Youth Services Department te tangkawpin Adventure Tourism lama hmalakna turin sum tam tak hmuh a nih tawh thu te a tarlang bawk.

E.Lungdar leh N.Vanlaiphai-a Tourist Lodge hawn te hi a inangin Building 5 ve ve sak an ni a, E.Lungdar ah Tourist Cottage Type A pahnih, Tourist Cottage Type B pakhat, Tourist Cottage Type B (Dormitory Block) pakhat, leh Tourist Facility Block Type A pakhat sak a ni a, sum Rs 115.97 lakhs sen a ni. N.Vanlaiphai ah hian Tourist Cottage Type A pathum, Dormitory Block Type A pakhat leh Tourist Facility Block Type A pakhat sak a ni a, sum Rs 113.32 lakhs sen a ni. Heng sum te hi Ministry of Tourism atanga dawn a ni.

Tourist Lodge hawnna inkhawm hi Tourism Director Pu Vabeiha Hlychho-in a kaihruai a, officials leh khawtlang hruaitu ten thusawina hun an hmang bawk. Tourist Lodge hawnna programme hi Aizawl leh Serchhip atangin Officials thenkhat ten an hmanpui bawk a ni.