State Consumer Protection Council chuan vawiin khan an Chairman, Food Civil Supplies and Consumer Affairs (FCS&CA) Minister Pu John Rotluangliana hovin Mizoram Legislative Assembly Secretariat Conference Hall ah meeting an nei.
Pu John Rotluangliana chuan Mizo mipuite consumer kan nih anga kan dikna humhalh leh hriat chian kawngah kan thangharh chho zel tiin Gas cylinder buk tling lova hralh leh tih chingpen tih tawp a nih theih nan Central YMA in theih tawp chhuaha sawrkar an tanpui avangin lawmthu a sawi a. FCS&CA department chuan ruahmanna thar siamin gas cylinder buk vek a ni tawh dawn a, mipuiin gas cylinder buk tling kan dawn theuh theih nan sawrkar hmalakna thlawp a, tang tlang a, dawh thei taka nghak turin Minister chuan mipuite a ngen a ni.
Vawiin meeting-ah hian agenda an ngaihtuah zingah tun aia chaka District Forum kal pui dan tur te, member leh staff te pawh ti punga sawrkar laipuiah sum dil tha an tih thu te; consumer te’n kan dikna chanvo kan hriat deuh deuh theih nana in zirtirna consumer awareness Mizoram pumah tun aia chaka kalpui tha an tih thu te; gas, petrol, diesel, cement buk dik piah lamah pawlh dalh loh mipuiin kan lei theih nan quality control lamah chak zawka hmalak tha tiin Enforcement Agency te tun aia changtlung zawka thuam tha an tih thu te an tarlang a ni. Consumer Protection Council meeting hmasa zawk thurel te pawh thlir nawnin thu tlukna an lo siam tawh bawhzui ngai la awm te bawhzui zel ni se tiin an rel bawk.
FCS&CA Secretary Pu Franklin Laltinkhuma chuan gas buk tlinglo nuai bo nan mipui tan tlan a tul zia sawiin gas hi a lang a paua corruption tamna ber nia a hriat thu a sawi a. Gas semna point tinah Gas cylinder buk vek a nih tawh dawn avangin mipuite dawhthei tur leh kan that tlanna tur a nih hre turin a ngen a ni.
Meeting-ah hian MLA Er.Lalrinawma bakah District tin Consumer Protection Council leh Association aiawh te, tlawmngai pawl hrang hrang aiawhte, sawkar dept hrang hrang aiawhte leh mi pawimawh dangte an tel a ni.
