Vawiin khan State Level Committee on Green Mizoram chu an Vice-Chairman, Enviroment & Forests Minister Pu H.Rohluna office chamber-ah an thukhawm a, E&F Parliamentary Secretary Col.Z.S. Zuala pawh he meeting-ah hian a tel ve a ni. State Level Committee hian June ni 11 (Thawhlehni) chu kumina Green Mizoram Day hman ni atan a nemnghet a, kum lo kal zel turah pawh June ni 11 hi ‘Green Mizoram Day’ atan hman ziah tuara rel nghal a ni.
Committee tan hmaa thuhmaruai sawiin Forest Minister Pu H.Rohluna chuan Green Mizoram Day leh Green Aizawl Committee kan neih thinte hian rah duhawm tak an nei chho zela, tunah chuan mipui mimir te pawh thingphun leh humhalh kawngah an bengvar tawh hle a ni, a ti. Nungcha, thing leh mau te hi mihring nena inngheng tlat an nih avangin kan ngaih pawimawh deuh deuh a tul a ni, a ti bawk.
Kumin Green Mizoram Day hawnna inkhawm chu ICFAI University, Mizoram Campus, Durtlang-ah zing dar 7:30 AM ah neih tur a ni ang a. Mizoram Chief Minister leh State Level Committee on Green Mizoram Chairman Pu Lal Thanhawla chu Khuallian turin beisei a ni. Zing karah VIP leh sawm bikten thing an phun ang a, chhun lamah sorkar department hrang hrang ten he hmunah tho hian thing an phun zui dawn a ni. Green Mizoram Day-a thingphun zawh loh, a chuangte chu E&F department ten subsidy-a hralh chhuah tura rel a ni bawk. Green Mizoram Day hi district tinah hman a ni dawn a, CYMA huaihawtin YMA Branch tin ten thing an phun dawn bawk a ni. Thing phun tur te chu E&F dept.-in a ngaihtuah vek dawn a ni.
Green Mizoram Day-a thingphunte a lo nun that lehzual nan leh mipui leh sorkar department-a mi te ngei pawhin kan mawhphurhna a nih zia kan hriat thar leh theuh nan, October thla ah sorkarin a ‘NI’ bik ruatin thingphun zawng zawngte enkawl (maintenance) hnatlang neih nise tiin Committee-ah hian rawt a ni bawk a. Hnatlang neih dan leh thingphunte nun that dan (survival %) report chu a nodal department E&F-ah thehluh nise tiin an rel bawk. Kum lo la kal leh tur atang chuan department tinte hlawhtlinna endik turin DFO kaihhruaina hnuaia tlawmngai pawl aiawhte nen Monitoring Team-in enfiah se, chung report atang chuan department ti thate hnenah lawmman sem nise tih an rel bawk a ni. Green Mizoram Day Programme hnuaia thingphunte hi mimal/pawlin tam tak an tichhe thin hi ram rohlu tak tihchhiatna a nih avangin a humhim nan sorkarin dan leh hrai fel tak duang se tih Committee chuan a rawt bawk a ni.
Kum 1999 atanga hman tan Green Mizoram Day-ah hian a zavaiin thing 20,66,047 phun tawh a ni a. Kum 2006 atang khan mimal ten an hun bik champhaphak leh hun chhinchhiah bik atana thing an phun tur ruahman sak ‘Sponsored Tree Planting’ an tih hnuaiah thing 172 phun tawh a ni bawk a ni.
