3441/2022-2023

Lunglei the 1st February, 2023 - Chhiat rupna lian tham lo thlen thulha chet lak dan tur enchhinna, "Mock Exercise on Earthquake" chu Mizoram pumah naktuk, February ni 2, 2023 khian buatsaih a ni dawn a. Hemi atana tul leh pawimawh inhrilh hriatna hun chu vawiin khan Lunglei DC Conference Hall-ah Lunglei District Disaster Management Authority (DDMA) Chairman, Bawrhsap Pi Ramdinliani hovin hman a ni.

Chairman Lunglei Bawrhsap Pi Ramdinliani chuan Mizoram chu Seismic Zone V a awm lan nih angin chhiat rupna a taka hmachhawn thei reng kan ni tiin Mock Drill chu uluk taka kalpui turin mawhphurna neitute a chah a. Lunglei District Disaster Management Plan tha tak siam a nih thu leh District Emergency Operation Centre (DEOC) pawh function-tir reng a nih thu sawiin, chhiatna thlen thulha hmang tangkai turin official leh tlawmngai pawl kalkhawmte a chah bawk a ni.

Vawiin meeting-ah hian District Administration official-te, Mock Exercise atana Site Observer leh Incident Commander turte, medical lam ai awh, YMA, Aapda Mitra leh Quick Response Team ai awhte an tel a. Mock Exercise buatsaih huna chet lak dan tur hrang hrang an sawi ho a ni.

Ruahman lawk dan chuan naktuk, February ni 2, 2023 (Ningani) hian Mizoram district headquarters zawng zawngah lirnghing lo thlen thulha felfai zawka chet lak dan tur enchhinna, "Mock Exercise on Earthquake Disaster" hi neih tur a ni a. Hmun hrang hrang panga (5) - zirna in, sawrkar pisa, mipui chenna, bazar leh damdawi inah te mock exercise hi buatsaih tura tih a ni a. Lungleiah chuan 2nd Bn MAPSchool, 2nd Bn MAP Office, MAP Hospital, Luangmual residential area leh 3 gate bazar-ah te buatsaih a ni dawn a. Chawhma dar 10:00-ah Luangmual leh a chhehvelah siren tihrik niin, mock exercise hi kalpui zui nghal a ni dawn a. Mipuite chi-ai lo turin DDMA chuan ngenna a siam a ni.

Mock Drill neih zawh hnu hian chawhnu dar 2:45 ah Disaster Management & Rehabilitation Minister Pu Lalchamliana hovin thlirletna leh sawihona Debriefing Session chu Video Conferencing kaltlanga neih a ni ang.