Ni 12, October, 2011 a neih tan State Level PYKKA Competition chu vawiin chawhnu khan Ramhlun Sports Complex, Aizawl-ah khar a ni a, kharna inkhawmah hian Sports Minister Pu Zodintluanga chu khuallian a ni.
Sports Minister chuan infiamna lama Mizoram dinhmun chawikang turin naupang ten kaihhruaina mumal an dawn a tulzia te, hmanraw tha leh hmun tha an mamawh zia te hria in sorkar chuan nasa takin tan a la a, kum 2 leh a chanve chhung chauh pawh hian a taka hmuh turin rah tha a chhuah der tawh a ni, a ti. Minister chuan India ram chhungah Mizo infiammi ten Medal tam tak an hawn mek a, tunah chuan India ram mai nilo khawvel huap inelnaah lawmman la tura Mizo naupang ten rilru an siam a hun tawh a ni, a ti a. Khawvel huap inelna sanga lawmman dawng pha tur chuan thahnemngaihna, taimakna, mahni inthununtheihna, taksa sawizawi leh enkawl that te a tul a ni tiin Pu Zodintluanga chuan District hrang hrang atanga kalkhawm naupang kum 16 hnuailam te leh Mizo thalai te chu tumruhna nen rilru thar pu turin a fuih a ni.
State Level PYKKA Competition-ah hian Mizoram chhung District tin atanga kalkhawm infiammi ten Athletics, Badminton, Basketball, Boxing, Football, Hockey, Judo, Table Tennis, Taekwondo leh Volleyball-ah te an inel a. A pumpuiah Champhai District chu pakhatna an ni a, Aizawl District chu pahnihna niin pathumna chu Serchhip District an ni.
Kharna inkhawmah hian Mizoram Youth Commission Chairman Pu Hmingdailova Khiangte bakah Mizoram State Sports Council Secretary Pu Lianzuala, Vice President Pu Rotluanga Fanai leh Joint Secretary Pu John Kima te pawh an tel a ni.
