No.4171/2021-2022
Aizawl, the 3rd March 2022: Vawiin khan Mizoram Samagra Shiksha buatsaih State Level Science & Mathematics Olympiad 2022 result puan leh lawmman semna inkhawm chu Conference Hall, School Education Complex, Mc Donald Hill, Aizawl-ah neih a ni a. Pu L. Thangmawia Vice Chairman HRD chuan khuallian niin a hmanpui.

Pu L.Thangmawia chuan he lawmman semna inkhawmah hian thusawiin Mizoram hian Science thiam hi kan mamawh a, ramdang tel lova kan khawsak theih nan mithiamte hi kan mamawh a ni a ti a. Media leh IT thang chho zel chu zirna atan hmang tangkai turin a fuih. Zirlaite chu an hmaa harsatna awm te inhnehtir mai lova, hnehtu ni turin a fuih a, mahni tawkah harsatna hi kan nei theuh a, retheih leh hausak pawh a ni lem lo, a paltlang thei apiang an hlawhtling thin tih sawiin zirlaite chu an hmaa harsatna awm paltlang turin a fuih a ni.

Lawmman semna inkhawm hi Pu Lalhmachhuana State Project Director Samagra Shiksha-in a kaihruai a. Pu V.L.Malsawma DySPD-in report a pe a, Pu C.Lalthanzira Additional SPD-in lawmthu a sawi a ni.

He Olympiad hi Zirlaiten Science leh Mathematics lama hma an sawnna atana Samagra Shiksha-in a buatsaih vawi khatna a ni a. District level leh State levela intihsiakna a awm a, State level chu State Project Office Samagra Shiksha ten an buaipui a, District level hi District tina Samagra Shiksha District Project Office ten an buaipui thung a ni.
District Level-ah hian hrileng avangin Offline-a intihsiakna buatsaih vek theih a ni lova, online leh video an submit atanga intihsiak te pawh a awm bawk. Science & Mathematics Olympiad-ah hian Class VI, VII leh VIII te anmahni level theuhah Science zirlaibu hmanga intihsiakna buatsaih a ni a. District tina Class VI,VII,VIII pakhatna theuhte tan State level-a intihsiakna hi neih leh a ni. State Level-ah hian Mathematics-ah anmahni zirlaibu theuh behchhanin multiple choice question hmangin an intihsiak a ni.

District level-ah hian Science lam bik thlur a ni a, an zirlaibua an duh duh la chhuakin lecture cum demonstration emaw power point presentation emaw chart leh hmanraw dang hmangin emaw an sawifiah a, Mizo tawnga sawifiah a ni a, Mizo tawng hmang thei lo tan English pawm a ni bawk. Mizo tawnga sawifiahtir an nih chhan hi an zirlai an hriatchian leh zual nan leh anmahni tawng ngeia a awmzia an hriatthiam leh zual beisei vang a ni. Topic thlan chhuah bik a awm lova, class VI-VIII te hian anmahni Science zirlaibua an topic duh lai ber zel la chhuakin an sawifiah a ni.
State Level Science & Mathematics Olympiad 2022-ah District hrang hrang atangin zirlai naupang 21 an tel a. Lunglei, Lawngtlai leh Hnahthial District te an tel thei lova, District dang zawng chu an tel thei a, District level neih zawh hnua State Level-a tel tur Champhai leh Khawzawl District a naupang pakhat ve ve te chu Covid 19 positive avangin an tel thei ta lo a ni. State Level-ah hian Lawmman dawngtute chu -
Class VI : First - S.Vanlalpeka
Beaulah English School, Siaha
Second - Vanlalmuanpuia Chhangte
Govt Chhiahtlang Middle School, Serchhip
Third - H.Lalhruaizeli
Oxford English School, Saitual

Class VII : First - H.Vanlalchhuanawma
Modern Middle School, Aizawl
Second - Lalhmangaihsangi
Oxford Middle School, Saitual
Third - Elina Zonunsangi
Govt Kanan Middle School, Champhai

Class VIII : First - Ethel C.Lalnunpuii
Presbyterian English School Saitual
Second - Hebah Lalremsiami
Mary Mount School Aizawl
Third - Vanlaltleipuii
St. Maria Gorrettis School, Kolasib

Lawmman pakhatna atan hian Tablet leh certificate pek an ni a, pahnihna leh pathumna atan smartphone leh certificate pek an ni. Lawmman te hi SEL Foundation Chanmari Aizawl ten an sponsored a ni.