Vawiin khan Parliamentary Secretary Pu Hmingdailova Khiangte chuan Nehru Yuva Kendra Sangathan, Mizoram Zone, Aizawl buatsaih Youth Empowerment Convention chu Youth Hostel, Luangmualah a hmanpui.

Pu Hmingdailova Khiangte chuan Mizoram hmun hrang hrang atanga Youth Empowerment Convention hmang tura kalkhawm thalaite chu Mizoram nghahfak an ni tih hria a rilru thar pu turin a fuih. Thalaite chu mahni ke a ding thei tura inbuatsaih tura chahin nu leh pa leh chhungte tibuaitu nge an nih an chhungkua theuh te innghahna tih mahni in zawt theuh turin a chah a. Lehkhazir kawngah te, ei leh bar thawhchhuah kawngah te mi hlawhtling ni thei tur chuan midangte aia taima leh thahnemngai an nih a ngai a ni, a ti. Parliamentary Secretary chuan Mizo thalaite zingah ‘hna’ tia kan sawi hi sorkar hna a ni chawk a, hei bak hi hna thawh tur tam tak eizawnna tling a awm a ni, a ti a. State pawn atanga lo lut hnam dangte’n Mizo thalaite thawh duh loh hna tam tak thawkin kan ram sum leh pai hi state dangah a luang ral a, mahni phak ang tawk theuh taima taka thawh hi a pawimawh ber tih hria a thawh duh loh leh thawh hreh nei lo turin thalaite a chah a ni.

Youth Empowerment Convention neih mekah hian chawhma lamah Mizoram State Tobacco Control Society Project Coordinator Pu Lalremruata’n zuk leh hmuam thatlohzia thalaite a zirtir a. Chawhnu lamah hian District hrang hrang atanga kal Culture Troupe panga te’n hnam lam intihsiak an neih bakah thupui pawimawh tak tak hmangin resource person pathum - Pi Lalthlamuani, Associate Prof. Hindi Training College; Dr.V.R. Ralte, Director Universal Hindi Communication Centre leh Pu Khamliana, Founder President Mizoram Youth Club te’n thu an sawi a ni.