Tukin zing kar khan Subject Committee III of Mizoram Legislative Assembly te chuan an Chairman Pu Lalrobiaka hovin Greater Saiha Water Supply Scheme hnathawh mek chu a hmunah an enfiah.

Saiha mipui chawmtu tur he tuilakna Tuitlawk lui atanga pump chhoh tur hi Rs. 2070.2 lakh senga thawh tur a ni a, nakkum March thla ah zo hman tura ruahman a ni. A hna pumpui hi 60% zawhfel a ni tawh a, khawl leh hmanraw pawimawh te chu dahkim tawh a ni a, pipe line pawh hi Saiha Helipad thleng phum chhoh a ni tawh bawk.

Assembly Subject Committee III Chairman hi Pu Lalrobiaka MLA niin member-te chu Pu John Siamkunga MLA, Er. Lalrinawma MLA leh Dr. K.Beichhua, MLA te an ni a. Contractor M/S Swarn Jayanti Construction Pvt.Ltd. te hnathawh leh Department hnathawh te chu uluk taka enin tha thawkhat a an hriat thu an sawi a, zawh hun tura ruat nakkum March 2015 ah chuan zo hman ngei se tih an duh thu an tarlang bawk. Subject Committee Member te hian an hriatthiam loh lai leh thil dik tawklo awm nia an hriat te chu chipchiar taka zawtin a enkawltu PHE department hote chuan an hrilhfiah bawk a, siamthat ngai leh tihdik ngai laite chu siamtha a tihdik nghal a nih tur thu department hotute chuan an sawi bawk.

Assembly Subject Committee III member te hi Assembly secretariat atangin Pu C. Lalbiakthanga D/S hovin officer 4 in an tawiawm a, PHE department atangin Pu Duhkima S.E. Lunglei hovin Engineer engemawzat in an tawiawm bawk a ni. Heng team te hian Lawngtlai pan nghalin Greater Lawngtlai Water Supply Scheme hmalakna an enzui leh nghal a ni.