No.3698/2021-2022

Aizawl, the 17th January 2021: Vawiin khan State Task Force on Immunization chu an Chairman Pu R. Lalramnghaka, Health Secretary hovin Directorate of Health & Medical Education (DHME) Conference Hall, MINECO ah an thukhawm.

Meeting-ah hian COVID-19 vaccination hmalakna kal mek chungchang te, pulse polio vaccine, routine immunization leh Mission Indradanush kumina neih hmabaka hmalak dan tur chungchang sawiho a ni a. Covid-19 vaccination hi Mizoram chhungah chak taka kalpui mek zel niin January ni 16 thleng khan kum 18 leh a chunglam ah 1st dose – 7,40,326 pek a ni tawh a, hei hi pek tur zat atangin za-a 96 a ni a, 2nd dose hi 6,03,941 pek tawh a ni a, hei hi pek tur zat atangin za-a 78 a ni. Kum 15-17 inkarte pawh Covid-19 vaccine COVAXIN pek zel an ni a. Kum 15-17 inkarah hian 1st dose hi 33,849 pek a ni tawh a, hei hi pek tur zat atangin za zelah 51 a ni.

Mission Indradanush hi 25 December 2014 atang khan India ram pumah kalpui tan a ni a. Naupang kum 2 hnuai lam leh nu naupai ten a hun dik takah hri danna an lak theih nan beihpui thlak a ni. Intensified Mission Indradanush 4.0 chu ni February ni 7, 2022 atangin beihpui thlak tan a ni dawn a, hri danna an dawn tur ang la dawng lo naupang kum 7 hnuailam an awm chuan a tul anga pek zel an ni bawk ang.

Pulse Polio Immunization (zeng hri danna) beihpui hi March ni 1 tanga ni 3 chhung neih tur a ni a, naupang kum 5 hnuailam te chu Zenghri danna (OPV Vaccine) pek vek tur an ni. March ni 1-ah hian Veng/khua tinah hmun hrang hrangah vaccine pekna Booth-ah pek chhuah a ni ang. Vaccine pekna hmun tur hi Veng tinah hriattir leh a ni ang. Mizoram leh India ram pumah zeng hri hi umbo ni tawh mahse ram thenawm Pakistan leh Afghanistan-ah te a la awm avang leh inkaihdarh a awlsam em avangin Polio Vaccine hi ngawrh takin, a hun biah pek chhuah zel a ni.

Sawrkai laipui chuan thla tin Health Sub-centre-ah Routine Immunization kalpuiin naupang leh nu naupai te tan Vaccine chi hrang hrang a pe thin a. Covid avangin hmun tam takah he Routine Immunization hi a khaihlak thin a, hei hi vawiin State Task Force on Immmunization Committee thukawm chuan a hunbi anga tluang taka kalpui a nih theih nan veng/khaw tina Village Health Nutrition and Sanitation Committee te chu uluk taka lo enpui thin turin a ngen a. Covid appropriate behaviour zawm harsatna hmun Health Sub-Centre-ah te chuan Routine Immunization him taka kalpui a nih theih nan hmun remchang zawk YMA/Local/Village Council-te nen ruahmanna siam turin a ngen bawk a ni.