Chief Minister Pu Lal Thanhawla chuan vawiin chawhma khan Salvation Army: India Eastern Territory CHAN (Community Health Action Network) ten mihring hmanga sumdawnna beihna atana inrawnkhawmna an buatsaih, State-Wise Consultation  Meeting on Human Trafficking chu khuallian niin a hmanpui.

Chief Minister chuan mihring hmanga sumdawnna chu ram hmelma lian tak leh a do kawngah pawh tanrual ngai thil a nih thu sawiin, CHAN Salvation ten hma an lo lak tawhna chu fakawm a ti a. Retheihna te, awlai zawka sum hmuh duh avang te, thil chinchang hraitloh leh vanduaina hrang hrang avangin mihring hmanga sumdawnna a lut ta leh mahni laina hnai te pawh hralh an awm thin thu sawiin Pu Lal Thanhawla chuan Mizoram pawh he sualna lakah hian a him loh thu a sawi a. India khawpui hmun hrang hranga Mizo Welfare te pawhin an lo buaipui fo tawh thin thu te sawiin, vawiin inrawnkhawmna buatsaih ang chu thil tul tak a ni, a ti a. Mizoram chu Asia chhim chhak ramte a hnaih zual avangin ruihhlo leh Dan phalloh thil dangte lak luh a awlsamin, human trafficking kan tihte nen pawh inkaihhnawihna nei thei thil a nih thu a sawi a. Sawrkar pawhin heng thil do kawngah hian hma la in nasa taka a thawh thin thu leh, chutih rual chuan tlawmngai pawl leh vangtlang ang zawng pawha tangrual taka heng sualna hi kan do ho a tul a ni, a ti a. Vawiin Consultation Meeting chuan hmalak zelna atan thil tha a thlenchhuah ngei a duhsak thu a sawi a ni.

Vawiin programme hi Major Lalliankunga, Project Director, CHAN-AHT (IET) chuan kaihruaiin, Commissioner Lalzamlova, Territorial Commander, IET chuan Keynote addressa pe a. Mithiam zawm bikte nen panel discusssion neih chhunzawm a ni.

Kum 2005 atang khan Mizoramah Human Trafficking do letna hna hi tan tawh a ni a. ‘India Eastern Territory Anti-Human Trafficking Project’ hi kum 2009 khan siam a ni a. He Project hi UK Territory Salvation Army te nen tangkawpin, Phase-I ah chuan  Mizoram chhung mai niloin North East State huam chhung, heng thlan bik -  Moreh, Imphal, Churachandpur, Shillong, Guwahati, Siliguri, Fatapukur, Darjeeling, Kalimpong leh Namchi-ah te hma lak tan a ni phawt. Phase –II tuna kalpui mekah hian Mizoram district thenkhat leh Assam leh West Bengal te huam telin, ram pawnah te pawh he hmalakna avang hian chhanchhuah hna te thawka kal thin a ni. State pawn a NGO hrang hrangte nen indawrijn hmalak ho thin a nih bakah Impulse NGO te nen tawngkawpin chhanchhuah hna thawhna kawngah awlsam zawka Myanmar leh Bangladesh a thawhpuite nen inbiakna tur hman mai Communication software te siam a ni bawk.