68/2025-2026

Aizawl, the 6th April, 2024: April ni 5, 2025 (Inrinni) khan Vigyan Bhawan, New Delhi-ah Statistical System tihhmasawn chungchang sawi hova State leh UT Minister-te intawhkhawmna ‘Conference on State Government Ministers on Strengthening of Statistical Systems’ neih a ni a. He hunah hian Mizoram aiawhin I&PR Minister Dr. Vanlalthlana a tel a ni.

He intawhkhawmah hian State leh Union Territory Minister hrang hrangte bakah Central leh State official thahnem tak an tel a. Pu Rao Inderjit Singh, Minister of State (Independent Charge), Ministry of Planning chuan Conference hi kaihruaiin, kalkhawmte chu State leh Union Territory-te'n sawrkar policy tha tak an duan theih nan data rintlak leh changtlung nei turin a chah a. India ram intodelh leh hmasawn siam tura hmalakna, Vikshit Bharat 2047 hlawhtling taka chuankai a nih theih nan data leh statistics behchhana thutlukna dik siam thin turin State leh Union Territory-a sawrkar fawng vuantute a fuih a. India ram pumin data leh statistic tha leh rintlak hmanga hmasawnna rah tha a tel theih nan kalkhawmte chu thawh hona tha tak nei zel turin a sawm bawk.

Conference-ah hian I&PR Minister Dr. Vanlalthlana chuan PowerPoint Presentation neiin Mizoram sawrkar, a bikin Planning & Programme Implementation Department leh Directorate of Economics & Statistics hmalakna hrang hrang bakah hmachhawpte a sawi lang a. Data leh statistics rintlak hmanga sawrkarin thutlukna tha zawk a siam theih dante a tarlang bawk.

He inkhawmpuiah hian ram pum huapa statistical system changtlung zawk neih a nih theih dan tur sawi ho a ni a. Support for Statistical Strengthening (SSS) Scheme, National Sample Survey (NSS), Gross Domestics Product (GPS), Index of Industrial Production (IIP) leh Consumer Price Index (CPI) chungchangte sawi lan a ni a. India khua leh tuite tana dataset pawimawh hmun khata dah khawmna e-Sankhyiki chu sawi ho zinga langsar zual a ni. He inkhawmpuiah hian MoSPI lehkhabu buatsaih ‘Women & Men In India’, NSSTA website leh MoSPI Micro-Data Portal-te chu tlangzarh nghal a ni.

Minister Dr. Vanlalthlana hi Pu B. Lalrinhlua, Director, Economics & Statistics leh Pu C. Vanlalvena, Assistant Director, Economics & Statistics te'n an tawiawm a ni.