Higher & Technical Education Department chuan STEE 2014 chungchanga Mizoram sorkar dinhmun leh hmalakna chu a hnuai ami ang hian an tarlang.

Higher & Technical Education (H&TE) Department chuan kum 15 kalta atang khan Mizoram Quota kaltlanga Higher Technical Course zir turte tan kumtin Technical Entrance Exam a buatsaih thin a. He State Technical Entrance Exam-a tlingte chauh chu an tih that dan indawtin Mizoramin quota a neihna hmuna zir tura thlan thin an ni. Mizoram quota kaltlanga Higher Technical course dilte hi chenna hmun leh hnathawhah te mi chi hrang hrang an nih thin avangin felfai zawka thliar hran nan July 1993-a The Mizoram Gazette-a notification-ah chuan, Mizoram quota diltute chuan Entrance Exam la kaltlang lo mahse Category I, II leh lll-ah then an ni a, Category l-ah leilung fate (Indigenous people of the state of Mizoram) dah an ni. Mizoram quota diltu an lo pun chhoh zel avangin kumtin Written Test (State Technical Entrance Examination, STEE) buatsaih a nih tur chu June 7, 1999-a The Mizoram Gazette-a Notification-ah tarlan a ni. Hetah hian category I, II leh lll-a then dan chu 1993 ang tho a ni a, ‘Indigenous people of the state of Mizoram’ sawifiahna tlem tarlan a ni.

Kum 2010 thleng khan STEE chu H&TE department hnuaia Technical Wing-in an buatsaih thin a, kum 2011 atang khan Mizoram Board of School Education (MBSE) kutah dah a ni. STEE 2014 pawh MBSE-in buatsaihin a ti tha hote chu Ranking a siam a; chumi ang chuan H&TE Technical Wing-in Quota neih milin Medical Group leh Engineering Group-ah seat an pe a. Engineering Group a Mizoram Quota tam zawk (121) erawh kumin atangin All India Joint Entrance Examination (JEE2014) a tih that dan indawtin MNIT-Jaipur kaltlangin Technical Wing (Mizoram Reporting Centre) in a pe chhuak a ni.

STEE 2014 Result a Category l-ah Medical group-ah Chakma zirlai 26 leh hnam dang zirlai 3, Engineering group-ah Chakma zirlai 12 hming awm anga sawi chu ngun takin enfiah a ni a. Hnam dang 3 hming lo langte hi chu tihsual palh liau liau niin a lang a. Chakma bikah chuan Result bu a hming lang zawng zawngten seat an hmu vek lo va; Medical group-ah 4, Engineering group-ah 2 chauh in seat an hmu a ni. Tun hma lam kum 10 chuang atang tawh khan Mizoram Quota a zirtur thlannaah Chakma hi Category-I ah an awm tawh a; kumin STEE 2014 atang chauha telh an ni lo a. MBSE-in anmahni thu a an dah pawh a ni hek lo.

Higher & Technical Education department chuan STEE 2014 kaltlang a Higher Technical Education course zirtur thlan chungchangah sawisel neuh neuh lo awm ta chu pawi a ti hle a. Thil dik lo a awm a nih chuan chhui chiang turin hma a la mek a. Category-I ah Chakma dah an nih chungchang thu inchuh awm mek hi thui tak ngaihtuah leh chhui a ngaih dawn avangin Mizorama cheng dik tak ‘Indigenous people of the state of Mizoram’ tichiang turin tunah hian Law Department lam a rawn mek a; an thu chhuak a zirin Category-I a awm tur chin leh hnawl ngai an awm pawhin hnawl tur chin a hriat mai tur a ngaih a ni. Dan felfai tak innghahna tur a awm hmaa hma lo lak mai chu him tawkah a ngai rih lo a ni.

Mizoram sawrkar pawhin MZP te ngenna hi zirchiang a, kum 1997 - 2014 thleng a Chakma bik ten he Technical Seat an lo hmuh ve dan te ngun takin a en a. Kum 2010 atang hian an lo pung chho hret a. 2013 ah 10 an tling lova, kumin ah phei chuan 26 lai an lo tling ta a ni. Hemi hi eng vang nge ni ang tiin Mizoram State Technical Selection Committee te leh Hon’ble Minister hovin Law & Judicial Department, District Council Affairs leh Election Department aiawh te sawmin ngun takin zir ho a ni a.

Heng seat hmu ta te hi Mizoram a Chakma awm dik tak fate anni em ti a zawhna te pawh sawiho niin, dik lo tak a state pawn a awm Chakma zirlaite hian an rawn exam ve ta mai em ni tih thlengin sawihona neih a ni. Chutih rualin heng finfiah tur chuan election ah Electoral Roll siamthar tur atang te leh Job Card, Rural Development Department In a siam atang te hian a enfiah theih a ngem tih thlengin ngaihtuah a ni. Nimahsela heng thil hi chuti mai a chinfel theih leh hmalak theih anih dawn loh avangin Election leh Rural Development Department te pawh ngun zawka thli thlai turin ngen nise tiin Minister hovin meeting chuan thutlukna a siam nghe nghe a ni.

Chuvangin tuna Chakma naupang 6 technical seat pek tawh te cancel leh hi dan rorelna hnuaia awm kan nih avangin thubuai hla buaia in chai buai theih te a lo ni nen, dan lam thiam mite thurawn tel lo chuan department mai a hmalak ngawt ngam chi ah sawrkar chuan a ngai lo a ni.

Chuvangin zirlai hruaitute pawh August thla chhunga heng seat te cancel tura an ngen hi fim taka ngaihtuah nawna, fel taka chinfel tlan hun nghak turin sawrkar chuan a ngen a ni.