Vawiin khan Mizoram Legislative Assembly hnuaia Committee peng pakhat Subject Committee – II a Chairman leh Member te chuan spot visit neiin PHE Reservior, Tuikhuahtlang; Referral Hospital, Falkawn; Tuirial a bawlhhlawh paihna hmun dumping ground; Aizawl Civil Hospital leh Pu Darchhinga Building, Dawrpui West te an tlawh a. Heng hmun ah te hian thli luan dan te, bawlhhlawh paih leh sawngbawl dante a thianghlim tawk em tih te leh dan ang thlapin damdawiin thli leh bawlhhlawh te an sawngbawl em tih te an enfiah a, rawtna engemaw zat an siam chu an Committee Report-ah la tarlan tur a ni.

Subject Committee – II Chairman hi Pu T Sangkunga niin Member dangte chu Pu R.L. Pianmawia, Pu P.C. Zoram Sangliana, Pu N. K. Chakma, Pu Vanlalzawma leh Pu Lalruatkima te an ni a. Mizoram Pollution Control Board (MPCB) Chairman Pu R.C. Thanga leh MPCB thuneitu dangte; Mizoram Legislative Assembly-a officer te leh Forests & Environment Department aiawh ten Subject Committee –II hi an tawiawm a ni.

Heng hmun an tlawhnaah te hian heng hmun hrang hranga thawktu leh mawhphurtu te chuan Subject Committee-II hi lo dawngsawngin thli leh bawlhhlawh an paih dante chipchiar takin an hrilhfiah a, Subject Committe-II a Chairman leh Member MLA rual te chu an bawlhlawh sangbawl dante a hmuna kalin an enkual a ni.

PHE Reservior Tuikhuahtlang an tlawhnaah PHE Engineer-te chuan nitin tui hi intlak a ni tih te an test ziah thin thu te an hrilh a, Subject Committee-II Member-te chuan tui an sawngbawl dan chu tha an tih thu leh Reservior area a ruahtui khawl dan chu ruahman tha an tih thu te an sawi a ni.

Referral Hospital Falkawn ah hian Medical Superintendent Dr Jane Ralte leh a thawhpui ten Civil Hospital, Aizawl, Cancer Hospital, Zemabawk leh Kulikawn-a Sawrkar Hospital atanga damdawiin bawlhhlawh ‘biomedical waste’ hal tura an dawn chungchang leh heng halhna bik ‘incenerator’ chungchanga hriattur pawimawh te MLA rual te an hrilh a, Subject Committee-II zawhna te an chang a. MLA rual te hian Incinerator dahna hmun an tlawh bawk. Private hospital te pawhin Falkawna incernator a man chawia an hman ve theihna tur ruahman tha an tih thu leh helai hmun a tek den venna tha zawk dah tha an tih thu te an sawi a. MPCB atanga Authorization an la neih loh chu a rang lama tifel turin a hrilh bawk.

Referral Hospital Falkawn ah hian Aizawla Sawkar damdawiin pathum atangin incernator a hal tur bik biomedical waste an dawng ziah thin a, January thla khan hetiang bawlhhlawh hi kg 640 vel an hal a ni.

Civil Hospital, Aizawl-a Medical Superintendent Dr. Rosangluaia leh a thawhpui dangte Subject Committee –II Chairman leh Member te chuan damdawiin bawlhhlawh leh hnawmhnawk uluk taka chi li a an thliar hran dante leh heng bawlhlawh an sawngbawl dante hi chipchiar takin an hrilh a, an bawlhhlawh paihna leh an thli luan dan te a hmuna kalin an en bawk a ni.

Subject Committee-II hian Tuirial bawlhhlawh paihna hmun Dumping Ground leh Pu Darchhinga Building Dawrpui West te an tlawh bawk a ni.