Vawiin hian Mizoram Legislative Assembly Subject Committee III chuan Lawngtlai a Greater Lawngtlai Water Supply Scheme thawh mek chu a hmunah kalin an enfiah.

Mizoram Legislative Assembly Subject Committee III in Mizoram chhim lama Public Health Engineering Department te hnathawh a hmuna enfiahna a kalpui mekah vawiin hian Lawngtlai a PHE Department hnathawh en a ni a. Greater Water Lawngtlai Supply Scheme thawh mek chu Committee hian chipchiar taka tlawh in Chengpawng hmun zawl a Pump House te Backwash Water tank, Filter Tank leh Clear Water Tank bakah Transformer lianchi bun mek te chu en in Contractor hna thawh dan an en a, Chawnhu a tui dahkhawlna tur Department in a sak pawh an en nghal bawk.

Greater Lawngtlai Water Supply Contractor Exelsior Merchant Private Ltd. Manager chuan an hnathawh mek chu hun tiam chhunga zawh hman ngei a in beisei thu Subject Committee Member te hi a lo hrilh a, chutih rualin a panna kawng a that tawk loh avanga harsatna an tawh nasat thu leh ruah tui tlak nasat avanga a hun taka thil an tih theih loh thin thu a lo hrilh a, heti chung hian a hun taka zawh ngei erawh an tum thu a sawi a ni. He Project hi Kum 2015 March thla a hawn hman tum a ni.

Greater Water Lawngtlai Water Supply Scheme hi Rs. 25.645 Crore senna tur tui lak Project niin Chhimtuipui lui khawl hmanga pump chhoh tur a ni a, Pump House, Backwash Water Tank leh Filter Cum Chemical House te hi Chhimtuipui atanga Meter 250 a sang ah sak niin heta tang hian Chawnhu a a dahkhawlna hmun tur Meter 750 a sangah pump chhoh leh tur a ni a, Lawngtlai Town chhung mipui pung chho zel tur hisap a kum 2040 AD thleng pawh a chawm thei tura ruahmanna hi siam a ni.

Chawhnu a tui dahkhawlna tur erawh hi chu PHE Department in a thawk thung a, tui litre nuainga dahkhawl theih na tura sak a ni.

Vawiin a Subject Committee III  te hi Chairman Pu Lalrobiaka MLA, Chairman ZIDCO leh member 3 - Pu John Siamkunga MLA, Law Commission Chairman, Dr. K. Beichhua leh Er. Lalrinawma te an ni a, Official eng emawzat in an tawiawm bawk .