Home Minister Pu R. Lalzirliana lehkhathawn chhangletin Johny F Lalhmangaihzuala, Lovely Proffessional University a Engineering zirlai thihna chungchangah Sudan Ambassador Khidir Haroun Ahmed chuan May ni 6 khan Home Minister hnenah tawrhpuina thu a rawn thawn a. Sudan sorkar leh mipuite aiawhin he thihna chungchangah hian thinlung taka pawi an tih thu leh vanduaithlak an tih thu a rawn sawi a ni.

Sudan Ambassador chuan inthianthatna leh inpawhtlanna tura infiamna buatsaihah a nilo zawnga thil a thleng ta chu pawi a tih thu sawiin an ram mi India rama lehkhazir tura lo kal zawng zawngte India khua leh tuite nena inngeih tlang taka awm tura an lo hriattir chhunzawm zel tur thu a sawi a. Kum 50 emaw kalta atang khan India ramah Sudan zirlai tam tak an lo zir thin tawh thu sawiin ram hruaitu pawimawh leh Minister dinhmunte hial chelh te pawh an lo awm tawh a, hetiang thil duhawm lo hi a la thleng ngai lo tih a tarlang a.

He vanduaina hi friendly match khelh laia thleng a nih avangin ruahman lawk leh tum lawk reng vanga tualthah luihna niin a lang lo va. Mahse chu chuan he tuarna hi a ti nepin pawmtlak nihna a pe hauh chuang lo tih sawilangin he vanduaina thlengin a nghawng tuar chhuak thei tur leh vanduaina tuartu chhungkuate channa leh harsatna sutkian sak tura thawhhona tha siam ngei an duh thu an tarlang a ni.

Zirlai naupang thi ta chhungte tana zangnadawmna pek chungchangah pawh a buaipuitu thuneitute thawhhopui an inhuam thu an tarlang bawk a ni.