Nimin khan Pu John Rotluangliana, Minister, Food Civil Supply & Consumer Affairs, Tranport, Tourism chuan Silrury khuaah Supply Centre NABARD kaltlanga Rs 105,73,000/- senga a din chu khuallian niin a hawng. He hun hi Pu V.L Robiaka, MLA Chairman ZIDCO Bialtu MLA chuan khualzahawm niin a telpui bawk.

Pu John Rotluangliana chuan Silsury leh Hnahva khuate tana buhfai dahkhawlna tur leh Staff Quarter hawn a ni ta chu lawmawm a tih thu a sawi a, tunhma chuan Silsury leh Hnahva khuate’n fur laiin kawng chhiat avangin buhfai lakluhna kawngah harsatna namai lo tak intawk thin a, chung ang harsatna lak ata chu Sorkarin a khaichhuak che u a ni a ti. Sorkar thilte keimahni ta anga en a, neitu thinlung erawh kan put a pawimawh hle a, hmun tam takah building tha tak tak leh thil dang pawh khaw mite’n duatna chang kan hriat loh avangin a ram mai thin a,hei hi a pawi hle a ni a ti.

Supply Minister chuan he Supply Centre ah hian bufai 2500qtl leng thei tur a ni a, helai chhehvel mipui ten fur laia harsatna an tawh lohna turin thal chhungin a tam thei ang ber buhfai dahkhawl a nih dawn thu a sawi bawk a ni.

Pu V.L Robiaka, khualzahawm pawhin thusawiin vawiin ni hi Silsury leh Hnahna khua te tana thil chhinchhiah tlak tak a ni tiin, helai khua leh chhehvel mipui ten buhfai lakluh kawngah kum tam tak harsatna kan lo tawk tawh thin a, Silsury a Supply Centre hawn a ni ta chu bial aiawhin lawmthu a sawi, he thil chhawr tangkai tu zawng zawngte pawhin lawmna chang kan hria a, duat taka enkawl turin a chah bawk a ni.

Nimin a Supply Centre hawn tak hian Godown pakhat leh Staff Quarter tur pahnih a keng tel a, Dt 17.3.15 a sak hna thawh tan niin Dt 17.3.16 in sak zawh a ni a ni, Lushai Engineering, Ramhlun S, Aizawl te chuan a sak hna hi an thawk a ni. He Godown ah hian buhfai 2500qtl leng tura lian a ni, hei hian thlaruk chhung he godown ringtu mipui te a chawm thei dawn a ni. Silsury leh Hnahva khua ah hian Ration Card nei mi 1088 an awm mek a ni.

Nimin ah Supply Centre hawn tak puala inkhawm hi Pu R. Lalramnghaka, Director FCS&CA chuan a kaihruai a, Khawtlang aiawhin Pu Surjosen Chakma VCP Silsury pawhin thusawina neiin Pu K. Hlimthanga DCSO, Mamit chuan lawmthu sawina a nei bawk.