Vawiin khan Secretariat Conference Hall-ah Food, Civil Supplies & Consumer Affairs Minister Pu John Rotluangliana hovin Direct Benefit Transfer of LPG (DBTL) Scheme chungchangah meeting pawimawh tak neih a ni a. He meeting ah hian Parliamentary Secretary Pu T.T. Zothansanga, Food Civil Supplies & Consumer Affairs Department Secretary Pu R. Lalvena leh FCS & CA Department officer te; Aizawl DC aiawh; IOC aiawh te; Mizoram pumah gas agency hrang hrang neitute, SBI, MRB leh MCAB aiawhte leh Mizoram Consumer Forum hruaitute an tel a ni.

Supply Minister Pu John Rotluangliana chuan DBTL Scheme hi thil thar mipui khawih thil a ni a, hemi chungchangah mipui lam atanga vuina awmte leh mipui harsatna te sutkian anih theih nan te, gas agent te harsatna leh bank lam inpuahchahna ngaihthla leh sawiho tura meeting hi koh anih thusawiin meeting chuan rah tha a chhuah ngei a beisei thu a sawi a. Hemi chungchangah hian thil hriatsual vang te, sual vang reng nilo thil tihsual awm te chu siamtha tur leh fel leh dik thei ang bera he thil hi kalpui anih theih nan inep lova thawhhona tha awm theih nan meeting hi koh anih thu a sawi bawk.

Gas connection transfer leh hmingthlakna chungchangah hian chhungkaw cheng ho ah subscriber hmingthlak ah fee chawi a awm lova, chhungkaw zing a mi, subscriber a boralin a chhungkaw zinga mi tupawh in a hminga a thlakin fee chawi a awm lova mahse hemi atang hian Death Certificate leh self declaration form te a ngai a ni. Chhungkaw member nilo, midang hnen atanga lei, hmingthlak ah security deposit chawi belh tur a awm a, chu chu a neitu hmasa in a gas connection a neihna a rei leh rei loh a zirin a inang lo a ni. Meeting ah hian Minister chuan chhungkaw chengho a hmingthlakna atana gas agent ten an hriatsual avanga consumer te hnena pawisa an chawitir chu an consumer te hnenah pek kir leh nise a ti a. Chhungkaw pakhat in gas connection pakhat aia tam an neih theih loh thuthang chungchang sawifiahin Minister chuan an duh chuan chhungkaw pakhatin gas connection pakhat aia tam an nei thei a amaherawhchu a man tlawma gas an lak theihna DBTL Scheme hnuaiah connection pakhat chiah ziahluh theih a ni a, hei hian kum khatah bur 12 chiah ah subsidy an dawng thei dawn a ni, a ti.

Mizoram Rural Bank leh Mizoram Co-operative Apex Bank a account neiten DBTL chungchang harsatna an tawh chu sutkian anih theih nan heng Bank te hian hma an la mek a. DBTL hmang thei turin National Payment Corporation of India hnuaia heng Bank pahnihte hian in register turin hma an la mek a, MRB chuan February ni 10 velah an tihfel theih an beisei thu an sawi a, MCAB aiawh pawhin hun reilo te ah anni pawhin an tihfel theih an beisei thu an sawi bawk. Minister chuan he thilah hian mipui te chi ai lo tur leh lo nghak hret turin a chah. Thingtlang hmun thenkhata internet inthlunzawmmna awm lohna hmun te chu exemption dil turin a rang thei ang bera IOC leh Ministry of Petroleum & Natural Gas ah te thlen anih theih nan hma la turin a mawhphurte te chu a hrilh a ni. Grace period chhung March ni 31 thleng, DBTL Scheme hnuaia la inziaklut lo ten gas man tlawm(subsidized rate) a an lei chhunzawmna kawnga harsatna a awm loh nan IOC aiawh te chu fel tak hma laksak turin a ngen.

DBTL Scheme hnuaia inziaklut leh Bank lama tihfel tawh te chuan he scheme hi an hmang thei tawh a, a subsidy zat chu an bank account an thun zel tawh a ni.