Vawiin khan Food, Civil Supplies & Consumer Affairs Minister Pu H.Rohluna chuan Zuangtuia-a Supply Godown a tlawh a, buhfai leh chini dinhmun te a hmunah a enfiah a ni. Minister hi FCS&CA Jt.Director (M) Pu Lalduhthanga bakah Godown Storekeeper leh hnathawktu dangten an lo dawngsawng a ni.

Minister chuan Mizoram pumpuiah Buhfai stock pangngai a that tawk thu a sawi a, mipuite thlaphanna tur a awm lo, a ti. Nikum khan ruahtui leh leimin tam vangin harsatna kan tawk a, kuminah chuan ruah pawhin zah a ngai a, kawng ping a awm meuh lo bawk a, buhfai leh chini stock leh semchhuah lamah harsatna a awm loh thu Minister-in a sawi a ni. FCI-in Guwahati atangin rel leh motor-in Mizoram thleng min phurh sak vek a, FCI Depot te pawh a khat vek a, Mizoram sorkar pawhin sum harsa chung chungin mipuite mamawh ber a ni tih hriain monthly quota a lei chhuak zel a, Mizoram khaw kilkhawr ber thleng pawhin mamawh tawk supply a awm a ni, Minister chuan a ti.

Tunah hian Zuangtui Godown-ah hian Buhfai 27000 quintals chuang leh Chini 850 quintals a awm mek a, tun thla supply stock leh Puja Special Chini pawh la thleng tur a awm thu Pu H. Rohluna hian a sawi a. Thla hmasa phei kha chuan Buhfai hi 29000 quintals chuang a awm a, chu chu Mizoram buhfai stock record a ni nghe nghe a ni. Mizoram hmun kilkhawr zawka Supply Godown kum 20 chuang ding tawh leh awngrawp tawh te sak leh chei that nan Ministry of Food & Public Distribution chuan a vaiin Rs.9.60 crores a sanction tawh a, a installment hmasa berah Rs.5.96 crores a release tawh thu Minister hian a tarlang bawk. Tun thla tawp hian Governor hovin New Delhi-ah Union Minister of State for Food & Public Distribution nena meeting an neih turah Mizoram-in Supply chungchangah harsatna an tawh hrang hrangte an sawiho tur thu a sawi bawk.

Mizoram mipuiten an quota a hun taka an lak theihna tura inpekna, taimakna leh theihtawp an chhuah avangin Supply Department hnathawk zawng zawng te chungah Minister hian lawmthu a sawi a. Sorkar-in Ration Card dik leh felfai zawka siam a nih theih nana tuna endik hna an thawh mekah hian  thil dik lo awm te haichhuah nan Village Council leh Supply Department hnathawkte chu mipuite pawhin theihtawpa thlawp turin Minister hian a ngen nghe nghe a ni.