Champhai DFO Pu C. Vanlalena chuan vawiin chawhnu dar 1 khan Champhai a Press mite kawmin Nungcha Humhalh Hapta hman mekah press mite tawiawm turin a sawm.

DFO chuan nungcha humhalh kawngah hian theih tawpin hma kan la ve a, Mizoram-a nungcha, Myanmar lama thawn chhoh tur pawh engemaw zat kan man tawh a, mahse International boundary a awm kan nih avangin harsatna tam tak kan tawk a, chak taka hmalak a harsa thin a ni, a ti. DFO chuan tunah hian Khawbung bial velah Wildlife campaign neih mek a ni a, kan RO in pasaltha te ko khawmin inkawm hona hlawhtling takin an nei a, a lawmawm kan ti hle a, Murlen National Park chhehvel khua ah te pawh campaign hi ngawrh taka neih mek a ni, a ti. DFO chuan hetianga nungcha humhalh lama department in hma kan lak mek lai hian kan staff te zinga sa pel ching sawi rik tur an awm leh zauh thin hi a pawi ka ti a, heng mite hi kan hmalakna ti thuanawptu an ni a, kan department ah hnathawk tlak an ni lova, hetiang mi hi hria in awm chuan min hrilh ula, action ka la ngei ngei ang a ti. Nauban chungchang sawiin kan ram rohlu a ni a, Myanmar lam mite hian min ruk zawh sak ti tih tawh a, a pawi takzet a ni. Kg khat lek pawh man anih chuan thubuai kan siamsakin District Jail ah tan tir thin an ni, a ti bawk.

Champhai District Honorary Wildlife Warden Pu VL Chama Hnamte pawhin thu tawi sawiin nungcha humhalh kawngah hian hmalak chak a harsa khawp mai a, mahse kan hmalakna ang angte Chief Wildlife Warden hnenah ah kan thlen a, Serchhip district leh Champhai district hi hmala tha ah min thlang ve a, hetiang dinhmuna kan din theihna chhan hi YMA leh Police ten nasa taka min thawhpui vang a ni a, kan lawm hle a ni, a ti. Kuminah Nghafuan veng lo turin Sub-Hqrs. YMA in hma a lak mek thu te, hei hi mipuiin zawm theuh se a duh thu te sawiin Nungcha humhalh kawnga hma kan lakah hian hlawh engmah kan nei lova, ram leh hnam leh khawtlang tan anih avang chauh zawk a ni, a ti. He hunah hian Champhai District MJA President Pu Lalhlupuia leh Pu C. Lalhnunpuia te pawhin thu tawi sawiin rawtna tha tak tak DFO hnenah hian an thlen a ni.