Rampuma Swachh Bharat Abhiyan (Clean India Campaign) neih mekah Vawiin (Oct. 31, 2014) khan PHE Serchhip WATSAN Division buatsaihin Serchhip-a zirna In hrang hrangah Sahbawn nena kut silfai a pawimawh zia inzirtirna neih a ni a, Serchhip District Bawrhsap, Pi Juhi Mukherjee, IAS chuan he hun hi

Govt. L.M. Middle School, Serchhip-ah a hmanpui a ni. Govt. L.M. Middle School-a Kut silfai a pawimawh zia inzirtirna hun, 'Campaign for Hand Washing with Soap' ah hian District Bawrhsap, Pi Juhi Mukherjee, IAS chuan Kut fai taka kan sil thin loh avangin natna chi hrang hrang mihring ten kan tawrh phah thin tih sawiin, inenkawlna atan sum tam tak sen a tul thin avangin heng natna laka kan invenna tur hian Sahbawn nen fai taka kut kan silfai thin chu a pawimawh thu a sawi a. Zirlai naupangte chu School leh hmun hrang hranga an infiamna ah te natna chi hrang hrang thlen thei natna hrik an kut leh taksa dangah a kai thei tih hriaiin, heng natna hrik in a thlen theih natna laka an him theihna turin kutsilfai a pawimawh zia hre reng turin a chah a. He Campaign hi a tawp hnuah pawh hriselna atana a pawimawh zia hre reng tura chahin, he Ni puala thutiam an lak te pawh vawng reng turin a chah bawk.

He hunah hian Dr. Vanlalchuanga, Medical Officer, JN Hospital Serchhip chuan naupangte hnena Sahbawn nena fai taka kut sil dan sawiin, Sahbawn tel lova kut kan sil hian kan kut a fai tawk thinloh avangin Sahbawn nen fai taka sil thin a pawimawh zia a sawi a, he Ni puala inkhawm neih zawh a nih hnu hian naupangte leh he huna tel te hian kut sil dan a takin an zirho nghal bawk a ni.

Vawiin a Swach Bharat Abhiyan puala inkhawm neih hi Er. Lalhruaia, EE, PHE Serchhip WATSAN Division chuan kaihruaiin he huna tel sorkar mi pawimawh, Zirtirtu leh zirlai naupangte chuan 'Faina Thutiam' an tiam bawk a. He a thutiam ah han Mahatma Gandhi khan India ram hi ram zalen mai ni lovin ram fai leh changkang ni turin a lo suangtuah thin tih hlawhtlin chu kan mawhphurh a nih thu tarlangin, hemi atan hian an hun seng turin an intiam a. Beisei let nei hauh lovin Faina lam hnathawh nan kartin darkar 2, a vaiin kum khata darkar za hun pe tura intiamin, engmah ti bawlhhlawh lo tur leh midangte pawhin an tih bawlhhlawh phallo tur te leh he thutiam hi midang 100 hnenah intiam ve tura fuih tur leh faina kawnga an hun darkar 100 hlan ve tura fuih tur te in an intiam a ni.