Vawiin chawhnu ah khan Health Minister Office-ah Pu Lal Thanzara hovin Health Department hotuten Swine Flu leng mek chungchangah Meeting an nei a.

Dr.K.Ropari chuan Mizoram atanga Swine Flu vei rinhlelh te thisen sample phai lama thawn thlak 10 zinga 4 ten swine flu an vei tih hriatchian a nih tawh thu a sawiin theihtawpin sawrkar pawh in Mizo mipuite himna turin hma a la mek a ni a ti. "Committee on Hospital Response to Emerging & Re-emerging Diseases" pawh din a nih tawh thu a tarlang.

He meeting-ah hian swine flu veite enkawlna tur atana tih Falkawn Referral Hospital thuam that leh tih changtlun belh dan tur chungchangte sawiho a ni a. State Referral Hospital-a Isolation Ward, ICU leh heng hmun atana damlo enkawlna hmanrua leh bungraw pawimawh atan hian Nuai 110 chuang lai sen a ngaih dawn avangin Health Department pawhin sum hmuh theihna turin nasa takin a ruahman mek a ni tih tarlan a ni a. Heng sum te hi National Health Mission, Directorate of Health Services, Directorate of Hospital & Medical Education leh sum hmuh theihna remchang apiang atanga dap khawm a ni dawn a ni.

Heng swine flu vei thar hmuhchhuahte zingah hian phai lama zin chhuak lem lote pawh an awm avangin swine flu hi eng angin nge Mizoram a lo tuam tih hi hriat mai a harsa rih a. Amaherawhchu, hemi chungchangah hian Health Department chuan mipuite chu tul lo va chi-ai mai lo tur te, social media lama thuthang diklo, mipui thin tithawng thei thehdarh lo turin a chah a. Swine Flu hi hritlang chikhat mai a nih thu te, enkawl dam theih a nih thu tarlangin tuna State Referral Hospital-a swine flu avanga enkawl mek mi pahnihte pawhin an pan mek a ni an ti a. Swine Flu damdawi pawh a tula hman theih turin chah thlen sa diam a ni tawh bawk a ni an ti a.

Swine Flu natna nei ni a in rinhlelhna nei reng reng chuan Phone Number. 0389-2319279-ah Office Hour chhungin zawhfiah theih reng a ni.