No.1112/2020-2020

Vawiin chawhma khan Tamil Nadu leh Puducherry-a Covid-19 inkharkhipna avanga Mizo tangkhang mi te chu tluang takin Bairabi Rail Station an lo thleng a. Dr H Lalthlangliana, Deputy Commissioner hovin, Medical team, Liason Officers leh Police venhimna tha tak hnuaia lo dawnsawn an ni.

Vawiin Bairabi Rail station-a lo thleng te hi an vai hian mi 884 an ni a, Aizawl district mi 346, Lunglei 50, Champhai 69, Serchhip 34, Kolasib 44, Siaha 136, Lawngtlai 46, Mamit 82, Saitual 37, Khawzawl 20 leh Hnahthial district mi 20 an tel a ni. Rail atanga an lo chhuk rual hian uluk takin Medical team ten Screening an lo kalpui a, an chuanna tur Bus-ah luhtir nghal niin, Bairabi rel station hi khaw chhung lut lovin, by-pass kawng atangin an chhuahsan a ni.

Vawiin a Bairabi Rail Station lo thleng ten anmahni district theuh an panna turin Bus 53 ruahman a ni. He thu buatsaih lai hian, Hot Zone atanga lo haw, mi 54 te zing 31 chu Rapid Antibody Test tih niin an la Negative vek a ni. District hlat dan a zirin Screening hi tih a ni a, chutiang zel chuan Bus pawh chhuah tir an ni. Siaha Bus chhuak hmasa berin Kolasib district chuanna Bus chu a chhuak hnuhnung ber a. Bairabi khaw pawn, Meidum thlen hma ah, ei leh in inpekna tur hmun uluk tak a siam sak an ni bawk a ni. Chaw an eina hmanrua leh ningnawite dahkhawl a paihna tur pawh he hmunah hian tha taka ruahman a ni.

Bairabi Rail station a mizo tangkhang lo haw ten anmahni district an panna kawngah tihkhawtlai an nih loh nan, vawiin chawhma dar 9 atang a tlai dar 4 thleng khan Zero point (Saihapui peng) leh Bairabi inkarah lirthei tlan khapna thupek chhuah a ni. Hetih rual hian mizo tangkhang lo haw te hi Kolasib DC Office leh Village Level Task Force engemaw zah te chuan hmun thenkhatah lawmna thuziak tarin an lo hmuak ve bawk a ni.

Tangkhang lo haw zinga Kolasib district mi te chu Polytechnic, Thingdawl Facility Quarantine ah khung hran tur a dah nghal an ni.