Rev. Dr.H.S. Luaia

Inleng pawimawh tak tak hi ka nei thin a, min tihlimtu ber pawh an ni a. Kan Doctor te erawhchuan "Thu zawt tura lo leng chu lo ngaihven tawh suh" an ti a. Rilru leh taksa hah a awm i tan a tha lo, an tih vang a ni a. Amaherawhchu kei akar min rawn kawm duh chu tiin ka lo lawm hle thin a. Hman zan (26.1.2007) chu Pu Zothankunga, IPRO Aizawl chu a hote nen an lo leng a. A thu min zawh pakhat chu ka chhang mumal lo hlein ka hria a, chuvangin ka han ziak nawn leh a ni.

          Mizo chuan 'Tar chu an naupang tha leh a, an lawmna a te a, an huat thu pawh a te a' an ti thin a. Hei hi thudik tak a ni a. Tar thenkhat chuan naupang hmuamral an pek pawh an lo beisei thin a ni.

          A dawt lehah chuan 'Tar chuan mi an hre thei lo' an ti bawk. Kei pawh Thingsaia ka zinin ka pi chuan a lo hriat lawk avangin ka han thlena min han hmuh chuan a lung a leng a, a tap a. Nakin lawkah chuan min hai leh ta a. "Khawii khua nge i nih?" min ti leh ta a ni. Kei pawhin mi ka hre thei tawh miah lo mai a. A zahthlak hle mai. An hmel hre mah ila, an hming ka hre tlat lo. Bible lehlina ka thawhpui ngei Rev. Chalbuanga pawh Diary ka ziak dawnin a hming ka theihnghilh tlat mai. Mak tak a ni. Hei hi tar vang chauh a ni.

          Thil pawi tak pakhat chu thil kan hriat rengna a bo tlat bawk a ni. Hei hi thil zahthlak tak a ni. Tar at vang bawk a ni e.

          Tin, mi tawng pawh kan hre thei lo. Upa Thangchhunga'n Serkawn pulpit bula a thut pawhin "I thu sawi chauh ka hre thei" a ti thin a, mak ka ti hle a, nimahsela kei pawh tunah chuan amah ang chiah ka ni ta. Hemi avang hian kei pawh Committee-ah hian ka kal duh ta lo.

          Amaherawhchu ka lawmna ber chu Pathian thu ka sawi dawnin ka ngaihtuahna hi a ding tlat thin a. Chang thlan tur hi min pe nghal thin hian ka hre tlat thin a ni. Chumi atan chuan Lalpan ka hun hi min la zuah a ni, ka ti thin. "A duh chen chen a dam ka phal ang" Sam 91:16 (Lehlin thar). Pathian hnenah lawmthu awm rawh se.

          Mizo hian 'Tar' kan inti hma em thin a. Kei chuan tar tak takte awm dan ka sawi a ni a. Kei pawhin hei hi ka thleng ve niin ka hria. Chuvangin thalaite hian tarte dimdawi dan an thiam a tul a ni e.