Vawiin khan Tawipui ‘N’-II Community Hall-ah PIA buatsaihin ‘Mass Awareness and Distribution of Assistance to Beneficiaries under IWMP Lunglei I’ neih a ni a, Lunglei HPC Vice-Chairman Pu S.Laldingliana chu Khuallian chan changin he hun hi a hmanpui a ni.

Mass Awareness inkhawm Tawipui ‘N’-II VCP Pu T.Sangkhuma kaihhruaiah HPC Vice-Chairman Pu S.Laldingliana chuan ‘Mat Watershed Developmeny Project’ hnuaiah tanpuina dawngte chu an vanneih hle a ni tiin sorkar chungah pawh lawmna chang hriaa theihtawp chhuah turin a chah a ni. Mipuite pawhin sorkar kan thlirdan her danglam a ngai a, sorkar atangin thil dawn ringawt tum lovin kan dinchhuah theih nan rinawmna leh taimakna nen kan hnathawhte tihpuitlin a pawimawh a ni, a ti. Pu S.Laldingliana chuan IWMP-in a tum ber chu ramngaw tichereu leh tuihna kang mekte ven leh siamthat hi a ni a; chuvangin sorkar atanga IWMP, NLUP leh scheme dangte kaltlanga tanpuina dawngtute hian tu leh fate tana chhenfakawm khawpa hnathawh leh ram siamthat hi kan bat leh kan mawhphurhna a ni, a ti bawk. Sorkar hmalakna thenkhat tarlangin Mizoram-ah leilung hausakna ‘oil’ verhchhuah hna tan a nih tawh thu te, Tuirial Hydel Project 60MW pawh nakum 2015-a hawn tura kalpui mek a nih thu te, Falkawn-ah Medical College leh Zemabawk-ah Cancer Hospital khum 100 awm theihna pawh chak taka kalpui mek a ni, a ti bawk.

Mat watershed Project-ah hian beneficiaries 190 an awm a, kum 2012-2014 chhungin tanky, arvulh, blacksmithy, fish pond, terracing leh thildang thawh a ni a. Vawiina IWMP hnuaia tanpuina semte chu Livelihood-ah chhungkua 28, Usher Group (Horticulture) ah 6 leh Pipe (4000 mts) sem a ni bawk. Lunglei BDO leh PIA ni bawk DR.Malsawmtluanga Fancun pawhin beneficiaries-te hriattur thil pawimawh hrang hrang a sawi a, ‘Awareness Campaign’-in a zui nghal a ni.