Vawiin khan Darlawn Joint VC te buatsaihin Tuivawl Bial MLA thar hmuahna leh lawmna Darlawn Bazar-ah neih a ni.

Pu Lalchhandama Ralte chuan he lawmna hunah hian thusawiin chanvo ropui tak a chan chu Pathian vanga chang a ni tih sawiin Pathian leh mipuite chungah lawmthu a sawi a. Hnathawk tura siamtu chu bial mipuite an ni a, hnathawh kawr an haktir avangin theihpatawpin a thawk dawn a, sorkar thar lakluh veleh CM duhdan angin tih tur an ti nghal a, an thutiam kawngah theihna sang ber nen hna thawh an tum tih a sawi a,

mipuite chu kawng hrang hrangah tawiawm turin a sawm. Pathian zarah chapo thei lovin thlan tlin a ni tih sawiin tute tan pawh tlangdung mipui tan hna thawh a tum tih a sawi. Zirna lamah chuan campaign laia an au hlate tihhlawhtlin a nih theih nan tawngtaina nena tawiawm turin a sawm.

Pu C.Lalmuanpuia, MLA pawhin he hunah hian thusawiin sorkar tharin zu a khap nghal hi sorkar hlawhtlinna a ni nghal tih a sawi a. SEDP-ah zirlai hlawhtlingte incentive award te, thiam thei bik scholarship pek te, competitive exam atan zirlaite tanpuina pek te a huam tuh a sawi a, zirlaite chu India mai ni lo, khawvela lang thama lehkha zir turin a fuih a, he ram leh hnam tana an thiamna hmang turin a sawm bawk.

East Phaileng-ah pawh Minister lawmna hun hi hman a ni a, MLA atana thlantlin a ni chu bial mipui zawng zawng tan a nih thu leh amah vote lotute tan pawh inthlahrunna tur a awm loh thu a sawi. Harsatna an neih ang angte chu khawtlang hruaitute nen enhova bawhzui a nih tur thu a sawi bawk.

Pu Lalchhandama Ralte hi a nupui Pi Flora Rosangpuii, Pu C.Lalmuanpuia MLA, School Education Dept Director Pu K.Laldingliana, Pu Lalhmunsanga Hnamte Director LESDE, Pu Lalhmachhuana SPD SSA, RMSA leh Party hruaituten an tawiawm a. Darlawn leh a chhehvel khaw mipui te, zirlai leh zirtirtuten an lo hmuak a ni.

Vawiin chawhnu vek khan Darlawn-a SSA Block Resource Centre BRC-ah sorkar hnathawkte nen hun hmanzui leh a ni a. Minister chuan Sawrkar hnathawkte kalkhawmte chu 'punctuality' ngai pawimawh turte an hnathawhna hmunah mipui pawh phak leh dawr nuam taka awm turin a chah a, an department theuh hmalaknaa puih an ngaihnaah tanpui a inpeih thu a sawi bawk.