2503/2026-2027

Dated Serchhip, the 5^th October: Vawiin khan DC Meeting Hall, Serchhip-ah Thenzawl Vengthar Village Council By-Election neihna tur atana Draft Electoral Roll tlangzarhna hun buatsaih niin Serchhip District Election Officer Pu Paul L. Khuma chuan a tlangzarh.

He hunah hian Deputy District Election Officer Pi Dorothy Muansangi chuan By-election atana inbuatsaihna leh hmalak dan turte sawiin, he By-election-ah hian VC seat hi a vaiin 3 a awm dawn a, chung zinga seat 1 chu hmeichhe tana hauh (Reserved) a nih thu a sawi a. Tuna tlangzarh tak Draft Roll-ah hian voter mi 372 an awm mek a, kum tling thar leh pem thar an awm theih avangin he Roll hi siam that (revise) leh tur a nih thu a sawi bawk.

Electoral Registration Officer (ERO) Pu Lalhlimpuia chuan Draft Roll hi January ni 8, 2025-a VC Inthlanpui behchhana siam a nih thu sawiin, VC hian Electoral Roll hran an neih thu leh, MLA/MP Electoral Roll, SIR 2026 neih zawh tak nen hriat pawlh loh tur a nih thu a sawi a. VC Electoral Roll-ah chuan January ni 1, 2026-a kum 18 tling chinte an tel theih thu sawiin, India khua leh tui dik tak, January ni 1, 2026 atanga thla 6 hmalam (6 months before 1st January 2026)-a Thenzawl Vengthar-a lo awm tawhte chauh an tel theih thu leh Scheduled Tribe-te tan chauh a tel theih thu a sawi bawk.

Serchhip District Election Officer Pu Paul L. Khuma chuan inthlanna boruak muanawm leh hlawhtling tak a awm theih nan mawhphurtu zawng zawngte chu theihtawp chhuah turin a sawm a. Draft Roll a tlangzarh zawhah Political Party hrang hrang hruaitute - ZPM Thenzawl Block, INC West Block, MNF West Block, BJP District President te, Village Level Officer (VLO) Thenzawl leh ERO leh AERO te hnenah a copy a sem nghal a ni.

Vawiin hun hmannaah hian Election Official-te bakah DIPRO, MJA leh Political Party hrang hrang aiawhte an tel a. Zawhna leh chhanna hunte hman niin, Thenzawl Vengthar Village Council chu thuneihna hman sual (misuse of power) avanga dissolve a nih thu leh, chumi avanga By-election hi neih tur a nih thu sawi a ni. 

Vawiina publish tak Draft Electoral Roll-ah hian, siam that ngai leh sawisel duh neite tan Claims & Objections thehluh theih hun, October ni 5 atanga ni 15, 2026 chhung hawn a ni ang a; chinfel hun atan October ni 16 atanga ni 23, 2026 chhung ruahman a ni a; October ni 24 atanga ni 31, 2026 chhungin Electoral Roll buatsaih leh chhutchhuah hna thawh a ni anga; Final Electoral Roll chu November ni 2, 2026-ah tlangzarh a ni ang.