3491/2024-2025

Dated Hnahthial the 12th December, 2024: Vawiin khan Thingsai Agri-Farming Cooperative Society enkawlna hnuaia PACS chu Pu Lalnunsanga, Chairman Mizoram Cooperative Apex Bank chuan a hawng.

Pu Lalnunsanga chuan tun dinhmunah Mizoram pumah PACS 100 a awm tawh thu leh thenkhat chu bank dang pawh ngai lo khawpa khawtlang tana innghah ngamna tak tak an nih thu sawiin chutih rual chuan a hminga ding ve mai mai an awm thu a sawi a. PACS hlawhtlinna chu society hotute taihmak leh rinawmnaah thui tak a inghah thu sawiin thawhhona tha tak nen chuan PACS hi khawtlang leh ram economy chawisangtu pawimawh leh bulthut tak tak anih thu a sawi.

Primary Agriculture Credit Society (PACS) hi India rama cooperative banking bulthut pawimawh tak niin hmun kilkhawr zawk, bank-in luhpawh a harsatna hmunah pawh a society member ten pawisa dah leh puk an tih ve theihna tura duan a ni a. PACS hian pawisa dahthat leh puktir bakah society te hmasawnna turin sumdawnna hrang hrang an khawih RBI chuan a phalsak bawk. PACS te hian anmahni member te hnena puktir tur pawisa an neih loh pawhin interest rate hniam zawkin State Cooperative Apex Bank ah te loan an dil ve leh thei thin a ni.

PACS hawnna inkhawm hi Thingsai Community Hall-ah neih a ni a. Pu MC Zosangliana, Chairman, Thingsai PACS in a kaihruai a. Rev. Lalhlenzoa, BCM Thingsai Pastor bialin hunserh hmangin Pu R. Lalrempuia, Director MCAB chuan vawiin a hna thawh chu a tuka miten rah an seng theih nan a ni tih hre tura a duh thu sawiin milian leh te ber thlengin tumah thlauhthla lo turin kalkhawmte chu a chah a ni.