Aizawl Civil Hospital-a thisen indaih lohna avanga damlo leh thawktu ten harsatna an tawh nasat avangin Association for Voluntary Blood Donation(AVBD)chu vawiin khan President Dr. Tlangkunga hovin Medical Superintendent office ah thisen mamawh tawk hmuh dan tur ngaihtuahin an thukhawm.

Synod Hospital Durtlang leh Aizawl Civil Hospital Blood Bank enkawltu ten an dinhmun an tarlan atangin Synod Hospital chuan nitina thisen an pekchhuah zat chu unit 20-30 vel a ni a, a thlawna thisen pek thla tin unit 350 an hmuh avangin thisen pek chhuah kawngah harsatna an nei rih lova. Hetih lai hian Aizawl Civil hospital erawh chuan nitina thisen an pek chhuah chu unit 40-45 vel a ni a. Damlo ten thisen hi a thlawna an dawn bakah an rulh that loh avang te, mi tlawmngaite thisen pekin damdawi in mamawh za zela 40% vel chauh a phuhruk avangin thisen indaihlohna a nasa hle a ni. Vawiina AVBD thukhawm chuan print leh electronic media hmangin mipui hnenah ngenna siam nise, an ti a. Thisen pek hlutna leh pawimawh zia in hrilh thar leh nan Radio leh TV ah te thusawina leh sawihona hun hman ni se, an ti bawk a. June 12 khian I&PR Auditorium-ah Workshop for Blood Donor Motivators nei turin AVBD chu a in buatsaih mek bawk a ni.