Ministry of Home Affairs, Govt. of India in a buatsaih, Myanmar Police Officer 28 te tana thlakhat chhung awh Spoken English zirna chu vawiin chawhma dar 11.00 khan an zirna hmun DIET, Champhaiah kharna hun ‘Veledictory Function Programme neih a ni.
Vawiin a kharna huna khuallian Champhai DC Pu Vijay Kumar Bidhuri chuan Myanmar Police te chu an training-na ah tih tak zeta an thawhrimna ah lawmthu a sawi a, eng tawng pawh nise ni 30 chhung lek chu zir nan a tawk lo hle a, chuvang chuan a theih ang anga Saptawng zir chu chhunzawm zui zel turin a chah a, tawng a thuhmun loh chuan inbiak pawh a harsa a, India leh Myanmar inlaichin zelna atan pawh inbiak pawh theih chu a pawimawh a ni, a ti. Myanmar Police Officer te chu an invawn felna, thuawihna leh hma an sawn chaknaah lawmthu a hrilh a ni.
He meeting, DEO, Champhai Pu K.Lalrintluanga kaihhruaiah hian Champhai SP Pu C.Lalthanmawia pawhin thutawi sawiin tuna training hi India leh Myanmar te in unauna bul tanna nise a duh thu a sawi a, misual, ramri kana tlanchhia te manchhuah kawngah tun aia tha zawka thawhho a duh thu sawiin hei hian Ruihhlo, ralthuam leh sorkar phalloh thil tawlhruk manchhuah kawngah kan hlawkpui ngei ka beisei a ni, a ti.
Myanmar Police aiawhin Officer pahnihin thusawina hun an nei a, Mina Ling Aung chuan Saptawng-a thusawiin, kan ramah kan hnam tawng chauh kan hman thin avangin ziak leh chhiarah harsatna kan tawk thin. English hi khawvel tawng tualleng, hnam hrang leh tawng hrangte inbiakpawhna atana tha ber a ni a, tuna kan training hian Tawng chungchanga kan harsatna tam tak min sutkian sak dawn a, tuna kan training hi a tawi kan ti hle a ni, a ti. MG Myat Swe pawhin Kawl tawnga lawmthu sawina hun hmangin vawiin hi ram pahnihte inlaichinna kawng hawngtu anih kan beisei a, he hun min buatsaih saktu India sorkar chungah leh Training min phalsaktu Myanmar Sorkar chungah lawmthu kan sawi a ni, a ti a, Myanmar ah pawh Police-a kan luh dawnin English hi Subject pakhatah a tel ve a, mahse kan hman zui loh avangin kan theinghilh zo tawh a, tun tumah hian kan theihnghilh tawhsa te kan hre thar leh a, kan la hriat loh tam tak kan hre thar bawk a ni, a ti.Champhaia Training an neih chhunga anmahni buaipuitu zawng zawngte chungah lawmthu sawiin, tih sual palh leh mi rilru tih nat kan lo nei palh anih chuan ngaihdam kan dil nghal a ni, a ti bawk. Hemi hnu hian DIET Principal Pu RL.Thianghlima’n lawmthu sawina a neih hnuah meeting chu tih tawp a ni.
Champhai DC Pu Vijay Kumar Bidhuri chuan Champhai District-a Office hrang hrangte bihchianna leh biakpawh theihna District Information & Grievances Redressal System Bu 2 a pe a, DIET in Training zawng zawngte hnenah Thangchhuah Diar leh Certificate an pe vek bawk a, Meeting zawh a chaw chhun an ei hnuah vawiin chawhnu dar 1.00 pm khan Tiau (Zokhawmawi) ah Bus in an va thlah ta a ni.
