Tourism Department leh Central YMA tangkawp buatsaihin nizan khan Lok Sabha MP Pu CL Ruala’nSaansad Adarsh Gram Yojana (SAGY) Phase-II hnuaia Model Village atana a thlan Lengpui khua-ah Tourism Awareness Campaign neih a ni.

Lengpui Community Hall a he hun buatsaih ah hian Pu Saitluanga, Joint Director, Tourism Department chuan inkhawm a kaihruai a, Central YMA aiawha thusawitu Pu R. Lalngheta, Vice President, CYMA chuan Lengpui khua Lok Sabha MP in model village atana a thlang chu thil inhmeh tak a ni a, Mizoram rawn tlawhtu khualzinte lo luhna hmasa ber pakhat a ni a, Mizoram hmel lanna hmasa ber anih avangin khawlai tihthianghlim kawngah te hma la nasa turin leh nungchang mawi leh zahawm lo chhawm nung zel turin mipui kalkhawm a fuih a, ruihhlo laka insum leh inthiarfihlim kawngah theihtawp a hma la turin mipui lo kal khawm te a chah bawk a ni.

Thusawitu dang Pi Rachel Lalrinhlui, Tourist Officer, Tourism Department chuan Tourism hmasawnna atan hian Mizo mipuite kan pawimawh hle a, Sawrkar a innghat  vek mai lovin mipuiin tih ve theih tawk tam tak kan nei a, ram leh hnam tan Tourism hmasawnna tur ngaihtuah hi tupawh in kan tithei a, eizawnna tlak leh ngelnghet Tourism kaltlang hian kan siam thei a ni tih a sawi. Pi R. Lalrinchhani, Tourist Officer, Tourism Department chuan mipui lo kal khawm te hnenah lawmthu sawina hun a hmang bawk a ni.

SAGY in a tum ber chu Model Village a thlan chhuah te hmasawnna kawng hrang hranga hmalakpui a ni a, zirna in tihchangtlun kawngah te, hriselna kawnga hmalakna te leh in leh lo nei mumal lo te chhawmdawl te, Mizo ze mawi chawisan kawnga hmasawn tura mipuite fuihthar kawngah te hma ala mek a ni.

Tourism Department hnuaia SAGY (Lengpui Model Village) –ah hian kawng tam takin hma alo la tawh a, Beaufication of Lengpui Road neih mek ani a. Lengpui Airport-ah Tourist Information Centre siam mek niin, Adventure Park, Lengpui pawh siam tura ruahmanna siam mek a ni bawk.