Mizoram Sawrkara Tourism Department hnuaia officers te leh thawktu dang te chuan nimin khan Tourist Lodge, Chaltlang-ah intawhkhawmna hun an hmang a. He intawhkhawna hun chawhnu session chu Tourism Minister Pu S. Hiato leh Parliamentary Secretary Pu H. Zothangliana ten an hmanpui a ni.

Pu S. Hiato chuan Mizorama in hmun dang angin khualzin te hip theihna tur thil hlui ang chi te nei lo mahse sik leh sa nuam tak mai kan nei te, a ram leilung awm dan mawi tak te leh a chhunga cheng mipui hawihhawm tak te chu khualzin hip thei thil pawimawh tak a ni, a ti a. Hetah tak hian Tourism Department-a thawk te chuan mawhphurna sang tak an nei thusawiin Tourism thang chhoh zelna tur chuan an thawhrimna, an inpekna leh an hnathawh naah thui tak a innghah avangin theitawp chhuah turin Department-a officer leh thawktu dang a bikin tuhnaia Tourism Department zawm thar, regularized te leh kaisangte chu a chah a ni.

Pu H. Zothangliana chuan Tourism Department-a thawk te chu Mizoram hmel lanna pawimawh tak mai anih avangin mite dawr chak leh pan chak ni turin tan lak reng a tul a tiin tawngkam chu an hmanraw pawimawh tak mai anih thu a sawi bawk. Department leh Mizoram tan thahnemngai taka thawk turin leh Department in hma a sawn zel theihna turah theitawp chhuah turin a fuih a ni.

Chawhnu session hi Tourism Department-a Director Pu Vabeiha Hlychho’n a kaihruai a, tunhnaia Department zawm thar, regularised leh kaisangte inhmelhriattirna hun chu Pu Biakthanmawia Pautu, Joint Director in a hmang a ni.

Chawhma session-a Department kaihhnawih thil hrang hrang te sawihona hun an hmang a, Tourist Lodge thlenna man leh ei leh in man te chu ennawn chu tha tiin hemi hi approval turin Sawrkar a thlen nise an tih an rel a ni. Sawrkarin tunhnaia Regular Post 30 leh Muster Roll Post 4 a pe leh heng post te hi hnawhkhah vek anih tawh bawk avangin lawmthu an sawi a, hei hian nasa leh zawkin Department a ti chak dawn a ni, an ti bawk.