Tourism Minister Pu  S.Hiato chuan nimin khan Hmuifang Tourist Resort  tlawhin khawtlang hruaitute nen meeting an nei nghal. Minister hi Pu H. Zothangliana, Parliamentary Secretary in a tawiawm a ni.
Minister chuan Tourism hnathawh dan leh hmalak dan te kalkhawmte hnenah sawifiahin khualzin tam tak hipkhawm an tum dante, Mizoram tan leh  Hmuifang khaw mipuite tan a chhenfakawm a nih theih dan tur te a sawi a. 'Lallianvunga hmun' ti a Hmuifang khua in an lo sawi thin tuna Tourist Resort sak nan a hman chu pawl leh mimalin emaw neih an tumna dal a tul thu te leh a chhehvel ramngaw leh nungcha humhalh a pawimawh thu Minister hian uar takin a sawi. Parliamentary Secretary Pu H. Zothangliana pawhin thing leh mau khuanu kutchhuak ang ang a humhalh chu ram ti hlu tu ber a nih thu sawiin Hmuifang khaw mipuite chu theihtawp chhuaha humhalh turin a fuih a ni.

He meetingah hian Hmuifang VC member tang lai mekte leh lo ni tawh thin te, YMA hruaitute, MHIP leh MUP hruaitute, Games and Sports hruaitute an kalkhawm a. Tourism Director kaihhruaina hnuaiah  Tourism ram huam chin tihfel chungchang leh a chhehvel ramngaw humhalh chhunzawm dan tur te an sawiho a.Hmuifang khua in tui leh playground neihloh chungchanga an harsatnate thlenin Minister leh Department hotuten theihtawp a puih an tum thu an sawi a ni.

Minister hian Tourist Resort a Conference Hall, Discotheque leh Health Spa awmna tura ruahman building sak mek leh khualzin te thlenna tur cottage sak mek te a enfiah a. Aibawk khua a Highway Restaurant Tourism department in a sak zawh tep pawh a hmunah a enfiah nghal bawk.