877/2022-2023
Aizawl, the 11th June 2022: Vawiin khan Silchar YMA-in Silchar khawpuia YMA Day an hmanh a ni a, Tourism Minister Pu Robert Romawia Royte chuan khuallian niin a hmanpui a ni.

Pu Robert Romawia Royte chuan thu sawiin YMA chu Zofate rohlu, khawvel Zofate suihkhawmtu a ni a, tanpui ngaite tanpuiin Mizo hnam tan hma a hruai a, hnung a dawl tlat bawk a ni a ti. Silchar Branch YMA chu damlo leh khualzin mi chi hrang hrang lo mikhuala lo dawltu in ni a, in fakawm tak zet a ni tiin Khuallian Pu Robert Romawia Royte chuan tang zel turin a fuih a ni. Silchar Mizote ngenna angin Silchar Mizoram House-a Hall emaw Tourist Facilitation sak chu Mizoram Sorkarin a ngai pawimawh tih sawiin, DPR te siamin a sakna sum zawn a ni ang a ti.

Tourism Minister chuan Mizoram sorkarin thenawm state te leh ram te nen inkungkaihna tha neih a duh thu sawiin Silchar leh a chhehvel Zofaten an tih tur leh tih loh tur an hriat thin avangin lawmthu a sawi a. Kohhran hrang hrang Pastor te leh Missionary te YMA nen tha taka an thawkho chu a ropui a ni a tih thu a sawi a. Khuallian Pu Robert Romawia Royte hian Silchar Branch YMA te leh Silchar MSU te chu sum faiin a tanpui bawk a ni.

He huna Khual zahawm Central YMA President Pu R.Lalngheta pawhin thu sawiin YMA-in Zofate insuihkhawm leh State pawna YMA branch te a ngai pawimawh tih sawiin, Silchar YMA te hnathawh dan fakawm a ti a.

Mizo thalai ruihhlovin a tihbuai an tam chu pawi a tih thu sawiin, MSACS hotute sawi danin tunhnaiah HIV a hluar zel a, thalaite fimkhur a tul hle a ti a, YMA Day chibai buk nan CYMA atangin Rs 5000/- an hlan bawk.

Silchar YMA Day programme hi Pu R.Lalrinawma, Vice President-in kaihruaiin Branch President Tv. K.Vanlalhriata pawhin thu a sawi a, Function zawhah mipuiin Day lawmna ruai an kilho a ni.

Silchar Branch YMA hian an remchan zawkna avangin YMA Day tak thlen hmain YMA Day hi an hmang a, CYMA Hotute leh Sports Deptt hotuten an hmanpui bawk.