878/2022-2023
Aizawl, the 11th June 2022: Vawiin khan Union Cabinet Minister of Fisheries, Animal Husbandry and Dairying Shri Parshottam Khondabhai Rupala chuan Mizoram rawn tlawhin, Taxation Deparment Auditorium-ah AH & Veterinary Minister Dr. K.Beichhua leh Fisheries Minister Pu K.Lalrinliana ten lo dawngsawngin, Lok Sabha MP Pu C.Lalrosanga leh Rajya Sabha MP Pu K. Vanlalvena ten an tawiawm a ni.

Union Cabinet Minister Shri Parshottam Khondabhai Rupala chuan sawrkar laipui hmalakna hrang hrang dawngtu (beneficiaries) ten Mizoram sawrkar atanga harsatna an dawnglo tih a hriatin lawmthu a sawi a. India sawrkar chu mi rethei te tana thawk niin, mi retheite chawikan nan scheme hrang hrang siamin, cheng nuai 5 thleng dawn theihna scheme pawh India sawrkar chuan a siam a ni, a ti a. Mi rethei leh chanhai zawkten damdawi a tlawm zawka lei theihna scheme pawh siam leh zel a ni a ti a. Covid-19 avanga ram a buai lai pawhin mi harsa zawk ten ration a thlawn a an dawn theihna pawh a siamsak bawk a ni a ti a. Heng bakah hian India sawrkar chuan Covid-19 vaccine a thlawnin a pe vek thei a, kan ram mipui te chauh nilo, ramdangah pawh a thawn chhuakin, ram dang tan pawh India chu a tangkai em em a ni a ti a. Infrastructure chungchangah India chuan hma a sawn nasa em em a, chung zingah chuan rail transportation pawh a tel a ni a ti a. Tun hnaiah Russia leh Ukraine indo karah Indian zirlaiten kan ram flag kengin kawng an zawh hmuhtur a awm a, India flag chu ramdangah pawh zah a kai chu ropui a tih thu a sawi a ni.

Union Minister chuan Mizoram in African Swine Fever avanga harsatna an tawh te sut kian nan AH & Vety College, Selesih chuan laboratory tha a neih a ngai tiin, proposal ziak turin a hrilh a. ASF vaccine pawh rampawn atanga a ngaihven sak tur thu a sawi bawk a ni.

Deputy Commissioner, Aizawl District hnen atangin sawrkar scheme hrang hrang- MGREGA, PMAY, PMUY, PMJDY, PMSvanidhi, PMKKKY etc kaltlanga hmasawnna rahbi dawng (beneficiaries) ten eizawnna bul an tan dan te, hlawhtlinna an neih chungchang ngaihthlak leh presentation neih a ni a. AH & Veterinary Department atangin African Swine Fever in Mizoram a nuai dan leh ASF avanga vawk vulh tam takin harsatna an tawh te ngaihthlak a nih bakah National Animal Disease Control Programme, Kissan Credit Card leh National Livestock Programme hnuaia hmalakna te leh adangte ngaihthlak a ni a. Fisheries Department atangin Blue Revolution Scheme, PMMSY leh scheme dang te atanga fish farmers ten hlawhtlinna an neih te ngaihthlak a ni bawk a ni.

He hun hi AH & Veterinary Department Secretary Pi Lalzarmawii chuan a kaihruai a, Fisheries Department Secretary Pu Laldawngliana'n he hun hi lawmthu sawiin a khar a ni.