Ni thum awh Thalfavang Kut 2014, ni 10 - 12 December, 2014 chhunga Tuirial Airfield-a buatsaih ni tawp ni chu vawiin 12 December, 2014 khan Pu John Rotluangliana, Tourism Minister in khuallian niin a hmanpui.

Thusawiin khuallian chuan Kut ni khat ni atanga a tawp ber ni thlenga hmangtu mipui zawng zawngte chungah lawmthu a sawi a, kut hi intihbuaina hmun ni lovin in unauna tha siamtu a ni tiin chutiang taka hman a ni chu a ropui takzet a, kum lo la kal leh zel turah pawh changtlung zawka buatsaih a nih tur thu a sawi bawk. Minister chuan kut kan hmanna senso te hi central in hemi buatsaihna tura sum min pek atanga ruahman a nih thu sawiin hrechiang lova lo sawisel vak chin hi thil pawi tak a ni a ti a bawk.

Thalfavang Kut hlawhtlinna tura theihtawp chhuahtu Department hrang hrangte chungah lawmthu a sawi rualin a tak taka tihhlawhtling tute chu mipui, hlutsaktute hi an ni tiin lawmthu a sawi.

Khuallian chuan kan hma lawkah Lal Isua lo pianna ni champha Christmas kan hmang leh dawn a, Zoram mipuite hlim taka hmang tura duhsakna hlanin Christmas chibai a buk bawk a ni.

Khuallian hian tun Thalfavang Kut a Paragliding Training chhuak mi 9 te hnenah Certificate a hlan bawk a ni.

Thalfavang Kut ni thumna, ni tawp ber ni kaihruaitu Pu T.T. Zothansanga, Parliamentary Secretary, Tourism pawhin thusawiin Thalfavang Kut hmang tura Department inbuatsaihna te sawiin a tir beiseina kan neih ai-maha a hlawhtlinna kan hmu ta hi a lawmawm takzet a ni a ti a, a hlawhtlin theihna tura theihtawp chhuahtu, Mizo Cultural Organisation Chalena Cultural Troupe, MTP Bru Cultural Troupe, mimal, Band leh thiam thil chi hrang hrang entirtu zawng zawngte chungah lawmthu thinlung takin a sawi. Captain S. Pathania leh Captain Saneer ten mipui tana Aero-Spoers/Power Hang Glider leh Hot Air Ballon/ Para Gliding ten an rawn buatsaih theih avangin an chungah lawmthu a sawi bawk. Vawiin Thalfavang Kut hmanna ah hian MCO, Chakma, Cultural Troupe, MTP Tuipang ‘V’ ten hnam lam entirin mimal leh Band ten zaiin mipui an awi a, Bike show ropui tak entir a ni bawk.

Pu Lalrinmawia Ralte, Minister of State, Environment & Forest pawhin Thalfavang Kut 2014 vawiin a hman hi a chhim bawk a ni.

Thalfavang Kut 2014 hi mipuiin an hlut hle a ni.