2999/2023-2024

Aizawl 11th December, 2023 : Mizoram Tourism buatsaih Ni ruk awh tur Winter Festival 2023 Cum Mega Exhibition, AR Ground a neih chu Pi Lalrinpuii, Tourism Minister chuan vawiin chawhnu khan khuallian niin a hawng.

Khuallian chuan Winter Festival buatsaih a ni chu lawmawm a tih thu sawiin kan kutchhuak leh kutthemthiamna te phochhuahna remchang tha tak a ni a ti a. Tourism chu Industry a nih angin eizawnna tha tak a ni a. Amaherawhchu, khualzin India Hmarchhak tlawhtute atangin Mizoram chuan 0.01% chauh tlawhtu kan nei a, chona min petu nise a duh thu sawiin Tourism hnuaia hnathawk zawng zawngte nasa lehzuala tan la turin a sawm a. Sorkar thar kan siam atangin thalaite'n eizawnna tluantling kan neih theih nan Tourism Industry kaihhnawihah Training buatsaih tum a nih thu sawiin zin mite enkawlna kawng Tourist management lamah pawh hmalak a nih tur thu a sawi bawk.

Kan ram ralmuang leh sik leh sa nuam em em mai hi khawvel huapa kan zawrh thiam a tul thu sawiin Tourism chu Smokeless Industry a nih angin sik leh sa vawnthat nan pawh a pawimawh hle a, kan ram economy than chhoh zelna tur atana kalkawng pawimawh tak a ni a ti bawk.

Winter Festival 2023 Cum Mega Exhibition hawnna programme-ah hian Cheraw, Hlado, Chheih Zai te bakah Zaipawl, Band leh Solo te ngaihthlak a ni a. A hmunah hian Food Court tiamin Stall hrang hrang 100 siam a ni a. Thil chi hrang hrang, Mizo kutchhuak thiamthil hrang hrangte mipuite lei theih tura phochhuah a ni.

Winter Festival ni ruk awh tur hman chhung hian nitin chawhnu dar 2 atanga zan dar 10 thleng Programme hrang hrang zai leh lam te ena ngaihthlak tur a awm thin dawn a. Zanin dar 7 atanga dar 10 thleng zaithiam tak tak te'n Concert an neih chhunzawm dawn bawk a ni. He hun hi a tam thei ang berin chhim tum theuh turin Tourism Department chuan Zoram mipuite a sawm a ni.

He hun hi Dr. Lalrozama, Secretary, Tourism Department chuan kaihruaiin kalkhawmte lawmna thu a sawi a. Dr. Lalrinawmi Ralte-in hunserh hmangin Pu V. Lalengmawia, Jt. Secretary, Tourism Department chuan lawmthu a sawi a ni.