2805/2022-2023
Aizawl 25th November 2022: Vawiin khan Tourism Minister Pu Robert Romawia Royte chuan Darlung khuain kum 100 a tlin lawmna hmanpuiin Centenary Lungphun a hawng a. Centenary lawmna Vantlang inkhawm, Darlung Lallula Hall Centenary lawmnaah thusawiin, "Darlung khuain kum 100 a tlinna denchhena Darlung haw runpui buatsaiha, Centenary lawmna an nei chu a lawmpui thu a sawi a. Darlung khaw chhuak hmun hrang hranga mi ten khua ngai pawimawha an haw khawm chu a entawntlakin Mizo nun ze mawi tak a ni" a ti.

ICT Minister ni bawk Pu Robert Romawia Royte chuan "Sawrkar leiba chungchang sawiin khawvel ram zawng zawngah Leiba tam leh tam lo chu thawhchhuah (GSDP) atanga leiba percentage hmanga chhût thin a ni. Tun dinhmunah Mizoram thawhchhuah (GSDP) a pun zêl avângin thawhchhuah (GSDP) atanga leiba percentage chu tûn hma zawng aiin tunah hian a tlêm ta a. Hei hi thil ropui leh lawmawm tak a ni a, thawhchhuah a pun zêl avângin leiba percentage pawh a tlêm tial tial a beiseiawm hle a ni" a ti.

Sport Minister Pu Robert Romawia Royte chuan "Covid Hripui karah pawh Sawrkar Department zawng zawngin hmasawnna hna an thawk mek a, Covid Hripui reh hnuah phei chuan Sawrkar Department hrang hrang ten Mizoram hmun hrang hranga hmasawnna hna an thawh hi hmuhnawm tham a tling a ni a ti. Darlung khawtlangin an Football Field laih zau an lo dil chungchangah Sports Minister chuan bialtu MLA Pu Lalrintluanga Sailo nen an sawi dun tawh thu sawiin, Sawrkar kum kal lai thal chhûnga Operation Mualzavata Programme hnuaiah laih zauh an tum thu a sawi a, senso thenkhat chu bialtu MLA tum tur a nih thu a sawi bawk. Sports Minister hian Darlung Centenary lawm nan cheng Singnga a pêk bakah Sports items te a pe bawk.

Minister hi Pu TC Pachhunga, Ex MLA & Vice Chairman, SEDP Board, Pu Rochhunga Ralte, Ex MLA & Vice Chairman SEDP Board ten an tawiawm a ni. Darlung khua Centenary lawmna hi nimin ni 24 November atanga tanin vawiinah chhunzawm a ni a, Centenary ruai pui an theh bakah Program hrang hrang neiin zaithiam zai te nen hun hlimawm tak an hmang a ni.